Arisan Basa Jawa

 Arisan Basa Jawa 

1.

Dhandhanggula

Arisan dadi srana pinanggih, 

Warga pendidikan basa Jawa, 

Ngiras buka pasa sore, 

Wondene saguh ngundhuh, 

Kanjeng Ibu Hesti Mulyani, 

Papane hotel megah, 

Premier Atrium, 

Penak jenak sigrak gumyak, 

Seger gempi suguhane mbanyu mili, 

Enak eca mirasa. 

Sukeng driya Bu Hesti Mulyani, 

Wusnya pinaringan panjang yuswa, 

Edi peni ngemban  cindhe, 

Sekar mlathi sumawur, 

Tata titi sumerbak wangi, 

Mitra Jurusan Jawa, 

Sami gupuh aruh, 

Kawibawan kawidadan, 

Karaharjan kasarira siyang ratri, 

Pahargyan sih mirunggan. 

2.

Mijil

Manembrama tumapaking warsi, 

Nem lima linakon, 

Dene nuju hari Jumah Wage, 

Telulas Maret gya anyarengi, 

Ramadhan kang sasi, 

Rong ewu nem likur. 

3.

Asmarandana

Mbabar kawruh filologi, 

Dhudhah dhudhah serat kuna, 

Pindha sesotya rinonce, 

Ngumandhang sastra piwulang, 

Murih gesang wijang terang, 

Sangu sambang sambung srawung, 

Mulang muruk mahasiswa. 

4

Maskumambang

Pacak baris niti priksa tata tulis, 

Anut parama sastra, 

Skripsi trus katitik becik, 

Tatasing titis wicara. 

5.

Durma

Lamun lepat enggal enggal kaleresna, 

Bu Hesti kondhang tliti, 

Mawa paugeran, 

Adhedhasar kawignyan, 

Jangkep genep genah maringi, 

Kanggo pepadhang, 

Bebrayan tembe benjing. 

6.

Kinanthi

Sagung siswa mbangun turut, 

Ndherek Bu Hesti Mulyani, 

Tata tertib pamulangan, 

Tanpa telat angon wanci, 

Kuliah sarwa tumata, 

Gancar lancar gelis wasis. 

7.

Sinom

Wekdal enjang sampun prapta, 

Samapta sigra makarti, 

Tata tata ruang kerja, 

Yen sinawang katon apik, 

Jalaran rapi resik, 

Meja kursi urut patut, 

Buku pulpen tinata, 

Kinarya tepa palupi, 

Kaprebawan amituhu ajrih sungkan. 

8.

Megatruh

Sepuh wutuh kapribaden tanggap tangguh, 

Kagem Bu Hesti Mulyani, 

Bebusana agung anggun, 

Pangandikan milangeni, 

Wewarah mawi wewaton. 

9.

Pucung

Bangun esuk gathak gathuk dadi mathuk, 

Sinambi makarya, 

FBSB kedhung ngelmi, 

Karangmalang kampus UNY kaonang. 

10.

Gambuh

Luru sajuru juru, 

Para murid sampun ngasta guru, 

Sungkem bekti dhateng Bu Hesti Mulyani, 

Paring udhu sangu ilmu, 

Urip sumunar sumorot. 

11.

Pangkur

Pariwara paripurna, 

Amarsudi wohing kridha pakarti, 

Pakaryan 

Bu Hesti luhur misuwur,  

Madhangi jagad raya,  

Wuwuh tuduh wus tinempuh dwija ampuh, 

Pangastuti sinengkalan, 

Rasa netra puji kaki. 

Paheman mangka paheman, 

Ing sengkalan manis jodho tawang  dwi, 

Bapak ibu anak putu, 

Kersa kempal manunggal, 

Sami tepung  seduluran raket dunung, 

Kokoh kukuh kulawarga, 

Departemen basa Jawi. 

Jumah Wage, 

13 Maret 2026.

Purwadi