Kidung Idul Fitri

 Kidung Idul Fitri




Perangan 1

Kupat Idul Fitri 2025


1.

Dhandhanggula


Konjuk dhateng Panjenengan sami,

Kula Purwadi lan Sari Indah, 

Dalah anak sedayane, 

Adityo kang rumuhun, 

Aryo Bimo kang nomer kalih, 

Anindito ketiga, 

Pareng unjuk atur, 

Bagya mulya hari raya, 

Idul fitri nyuwun gunging pangaksami, 

Lahir batin sumarah.


Sami eling dinten Senin Paing, 

Telu siji Maret gya lumampah, 

Tahun rong ewu selawe, 

Mahargya wanci agung, 

Manggih riyaya idul fitri, 

Winastanan lebaran, 

Suwara gumuruh,

Ngumandhang ing awang awang, 

Tahlil takbir tahmid tasbeh dikir, 

Pasa Ramadhan purna. 


2.

Megatruh


Minal aidin wal faidin umatur, 

Pangapura lahir batin, 

Bapak ibu para sepuh,

Kangmas mbakyu adhik adhik, 

Jawat asta amiraos. 


Pulang kampung lumaksana turut lurung,

Saking kutha hilir mudik, 

Desa sejatine hulu, 

Pralampita wong ngaurip, 

Saguh momong momor momot.


3.

Mijil


Ngulandara ngayahi pakarti,

Bang wetan bang kulon, 

Saurute wilayah kidul pesisir, 

Mangka tukang tani, 

Among dagang bakul. 


Lumampah saking Minomartani, 

Ngaglik Sleman katon, 

Yogyakarta kana kene rame, 

Sakjroning pahargyan idul fitri, 

Takbiran keliling, 

Rasa suka sukur. 


4.

Maskumambang


Wus gumelar klasa jembar anglenggahi, 

Bawa rasa barang karsa, 

Jaman kekancan kawuri, 

Hari raya sumadiya.


Salatiga Semawis tatas patitis, 

Pasrah mbayar zakat fitrah, 

Angger anggering agami, 

Suka rena tyas sesama. 


5.

Pangkur


Suguhan kacang rengginang, 

Madumangsa wajik jenang keripik, 

Emping mlinjo tempe tahu, 

Juwadah marning renyah, 

Nuli ngunjuk wedang kopi jahe mathuk, 

Sempulur sanak sedulur, 

Tampa paring pangaksami. 


Tumuju ing Jawi wetan, 

Grogol Mojorembun Rejoso ugi, 

Tlatah kabupaten Nganjuk, 

Ndherek mangayu bagya, 

Siyang dalu sakjroning bada kadulu,

Cukat rikat saben brayat, 

Griya wiwara ngubengi. 


6.

Kinanthi


Sigrak gumyak renteng runtung,

Pisowan silahturahmi, 

Golong geleng wadya bala, 

Sepuh anem jaler estri, 

Mupakat srengat manpangat, 

Mitra jawat asta mukti. 


Wiwit malem sanga likur, 

Gita gita nawung gati,

Apem karya wilujengan, 

Colok colok urup geni, 

Padhang jingglang pinggir lawang, 

Wulan pasa wis mungkasi. 


7.

Asmarandana


Busana abyor nelahi,

Baju koko wus rinengga, 

Mustaka kethu kapiyeh, 

Sandhal terompah bakiyak, 

Dandan gagrag santri kesah, 

Bebet sarung katon agung, 

Prasaja pasrah sumarah.


Lumakune bada kecil, 

Winastanan bada kupat, 

Kapernah sepasarane, 

Ing pendhapa Kamituwa, 

Wakil brayat masyarakat, 

Perangane desa dhukuh,

Tata cara wilujengan. 


8.

Pucung


Jangkah laju linakonan kanthi mlaku, 

Atur sungkem sembah, 

Dhateng pepundhen pinundhi, 

Nyuwun lilah ing pangangkah antuk berkah.


Wus lumaku upacara pancen perlu, 

Wiwit sasi Ruwah,

Nyadran unggahan murwani, 

Banjur pasa telung puluh dina bada. 


9.

Gambuh


Bungah esem gumuyu, 

Teguh hayu ginanjar rahayu, 

Amarsudi ati lathi kang nyawiji, 

Kalepatan banjur lebur, 

Pangaksama lahir batos. 


Tumrap wilayah Nganjuk, 

Rina wengi nganti sore esuk, 

Idul fitri srana ngleluri tradisi, 

Warisan para leluhur, 

Arwah suwargi wigatos. 


10.

Durma


Jiwa raga kaluputan wani ndhandha, 

Dosa salah ngakoni, 

Pribadi nglenggana, 

Apura ingapura, 

Lawang tobat tulusing ati, 

Gya lineburna, 

Riyaya idul fitri. 


Ngulandara tumekeng manca negara, 

Ngudi undhaking urip, 

Srana ngupaboga, 

Makarya jaban kutha, 

Purnaning idul fitri, 

Sigra lelana,

Ngrampungi kehing wajib. 


11.

Sinom


Wulan siyam paripurna, 

Wiyati ngumandhang takbir, 

Tahlil tahmid kapiyarsa, 

Manunggaling pikir dikir,

Suwara bedhug muni, 

Tapakur bareng tadakur,

Kamulyan kawidadan, 

Arum rahayu lestari, 

Keh barokah krana binarung ngibadah. 


Sasi bada karya suka, 

Run tumurun angleluri, 

Sanak kadang pawong mitra,

Yekti minangka piranti, 

Tali silaturahmi, 

Gya manungkul padha kumpul, 

Dol tinuku pawarta, 

Cerak tebih kapenggalih, 

Puji puja ayem tentrem bagya mulya. 


Perangan 2

Babad Idul Fitri 2024


1.

Dhandhanggula Idul Fitri. 


Sugeng hari raya Idul Fitri, 

Wonten ngarsanipun Panjenengan, 

Konjuk sesepuh pepundhen, 

Kangmas adhik lan mbakyu, 

Purwadi Sari nyuwun idi, 

Adityo Bimo pasrah, 

Anindito matur, 

Ulat patrap lan pangucap, 

Kirang utami luberna welas asih, 

Dhateng kula sakbrayat. 


Pareng nyuwun gunging pangaksami, 

Awit saking kehing kalepatan, 

Ingkang alit saha gedhe, 

Jroning sambung lan srawung, 

Muna muni kirang prayogi, 

Anungkak tata krama, 

Tilar unggah ungguh, 

Sopan santun suba sita, 

Pasrah dhiri mumpung hari Idul Fitri, 

Kula trimah nglenggana. 


Idul Fitri purna wulan suci, 

Takbir tahlil tahmid gya ngumandhang, 

Wiwit surupe srengenge,

Siyang dalu amunjuk, 

Suka sukur marang ilahi, 

Sholat Id wanci enjang, 

Jamaah sing khusuk, 

Lebaran muncar sumunar, 

Jawat asta sarana silahturahmi, 

Apura ingapura


Manggih hari raya Idul Fitri, 

Wusnya nglampahi pasa Ramadhan, 

Kana kene sajak rame, 

Sumadya dhahar ngunjuk, 

Suguhane jan mbanyu mili, 

Jadah jenang rengginang, 

Lonthong kupat tahu, 

Wajik klethik madu mangsa, 

Wedang jahe unjukan teh secang kopi, 

Srana mbangun memitran.


Pahargyan Idul Fitri kawuri, 

Katindakna nata tanah Jawa, 

Prabu Hadi Kotagedhe, 

Paring tumpeng winangun, 

Gunung ageng pan Mandragiri, 

Pareden dipun arak, 

Liwat alun alun, 

Ginarebeg pra kawula, 

Surenggami luwih dhisik andongani, 

Rena hayu widada. 


2.

Kinanthi Idul Fitri. 


Takbiran rinengga bedhug, 

Wanci malem Idul Fitri, 

Ngagungke asma Pangeran, 

Maha murah wus peparing, 

Kanugrahan berkat drajat, 

Rahmat hidayat sejati. 


Sowan mring para sesepuh, 

Caos sungkem pangabekti, 

Dimen pikantuk barokah, 

Donga puji pangastuti,

Dhihin wus aweh wulangan, 

Wejangan wedharan urip. 


Amangkurat Mas rumuhun, 

Mahargya lebaran Fitri, 

Binantu kawula Rembang, 

Kawula Daha Kediri, 

Saudagar Surabaya, 

Trahing Pekik Wandhansari. 


3.

Pangkur Idul Fitri. 


Gembira hari lebaran, 

Idul Fitri padha silaturahmi, 

Sanak kadang padha kumpul, 

Bujana andrawina, 

Tukar kawruh nyambi kulakan pituduh, 

Liru pernah pengalaman, 

Urip bisa luwih becik. 


Kepyek sakjroning jagongan, 

Karem ngrembug babagan warta warti, 

Kapiyarsa kang kadulu, 

Mrih jumbuhing panjangkah, 

Gathak gathuk mbudidaya sarwa mathuk, 

Kang kajangka kasembadan, 

Perbawa riyaya Fitri.


Kanjeng Ratu Mas Balitar, 

Garwa Paku Buwana Kartawani,

Putri bupati Madiun, 

Lebaran maos kitab, 

Serat Yusup pra mudha kinen sumurup, 

Wedharan serat Ambiya, 

Pangawikan Idul Fitri. 


4.

Asmarandana Idul Fitri. 


Rasa tresna welas asih,

Tuwuh ing wanci lebaran, 

Bakale ginanjar gedhe, 

Kedah mbayar zakat fitrah, 

Marang warga kacingkrangan, 

Amrih melu mesem ngguyu, 

Bareng suka parisuka. 


Jamak lumrah Idul Fitri, 

Ngloberake dana driyah, 

Sandhang busana pangangge, 

Gumebyar klambine anyar, 

Fakir miskin krasa mulya, 

Melu seneng dhahar ngunjuk, 

Dayane dina lebaran.


Jeng Ratu Mas Tasikwulan, 

Mahargya hari lebaran, 

Lenggah ing madyane bale, 

Paku Buwana kaping sad, 

Kang ndherek trah Singaprana, 

Rumeksa putrane ratu,

Gusti Raden Mas Duksina. 


5.

Gambuh Idul Fitri. 


Lebaran hari luhur, 

Salah lali luput bakal lebur, 

Lawang tobat  menga wanci Idul Fitri, 

Kanca rowang pra sedulur, 

Angapura lahir batos. 


Idul Fitri kang agung, 

Dadi ajang sambang sambung srawung,

Gumyak sigrak nyawiji silaturahmi, 

Adoh cedhak kersa rawuh, 

Pasuryan terang sumorot.


Ngungak jaman rumuhun, 

Demak Pajang Mataram kadulu, 

Idul Fitri wulang wuruk para wali, 

Sejarah lebaran perlu, 

Prayogane njur diwaos. 


6.

Sinom Idul Fitri.


Idul Fitri tanah Jawa, 

Nalikane para Wali, 

Guru suci Kraton Demak, 

Sultan Amirul Mukminin, 

Adang apem rumiyin, 

Papanipun Masjid Agung, 

Kinarya wilujengan, 

Bedhug ditabuh tumuli, 

Takbir tahlil ngumandhang ing awang awang. 


Raden Patah Alam Akbar, 

Gantya Yunus Adipati, 

Sultan Trenggana ping tiga, 

Mengeti riyaya Fitri, 

Arane bada kecil, 

Mapan tengah alun alun, 

Paring lonthong ketupat, 

Bebarengan bocah cilik, 

Ngalap berkah dimen uripe sumarah.


7.

Mijil Idul Fitri. 


Pajang mahargya riyaya Fitri, 

Mapan ing Pengging lor, 

Bebusanan biru ijo jene, 

Pinandhegan Sultan Jaka Tingkir, 

Wetane Merapi, 

Kembul aneng Umbul. 


Jadah jenang kupat lonthong wajik, 

Gathot thiwul grontol, 

Sentana nayaka dhahar rame, 

Abdi gandarasan purwa kanthi, 

Ratu Pajang ngesti, piwulang rahayu.


8.

Durma Idul Fitri. 


Amangkurat Agung narendra Mataram, 

Mahargya Idul Fitri, 

Plered dhatulaya, 

Ajibarang Banyumas, 

Munya tambur gong bendhe beri, 

Ramya lebaran, 

Nunggil kawula gusti. 


Kanjeng Ratu Kencana anyawur arta, 

Rikala bada kecil, 

Bareng gangsa munya, 

Lengger tumuli mbeksa, 

Suguhan kupat jadah wajik, 

Tempe mendhoan, 

Sigrak lebaran Fitri. 


9.

Maskumambang Idul Fitri. 


Amangkurat Amral narendra Mentawis, 

Lebaran ing Kartasura, 

Dhahar kupat sega gurih, 

Kembul ing kali Larangan. 


Sega liwet pasugatan Idul Fitri, 

Kupat lepet cabuk rambak, 

Soto timlo bothok teri, 

Wilujeng wong saknegara.


10.

Pucung Idul Fitri. 


Urup urup kembang api sigra murup, 

Gumebyar Mataram, 

Angrenggani Idul Fitri, 

Mercon munya karya suka jagat raya. 


Dhahar ngunjuk pra kawula pancen mathuk, 

Mahargya lebaran, 

Sunan Amangkurat Jawi, 

Putra wayah marsudi   barang sing berkah. 


Alun alun ganda dupa kang kumelun, 

Miwiti lebaran, 

Pitung dina pitung wengi, 

Keh kagunan kanggo lipure bebrayan. 


Dha lumaku papane sajuru juru, 

Saking kutha desa, 

Kartasura ing Mentawis, 

Hari raya Idul Fitri sung gembira. 


Saking kidul Wonogiri Klaten kumpul, 

Sragen Karanganyar, 

Sukoharjo Boyolali, 

Ing brang wetan kulon pesisir kepranan. 


11.

Megatruh Idul Fitri. 


Hari raya Idul Fitri Jeng Sinuwun, 

Paku Buwana kaping tri,

Rinengga lan seni luhung, 

Takbir tahlil tasbeh tahmid, 

Bareng santiswaran jedhor. 


Nuli dhahar wajik jenang ketan biru, 

Tumuju taman wedari, 

Maos babad para Ratu, 

Kang mituhu Kanjeng Nabi, 

Tambah mubyar ingkang pamor.




Senin Paing, 31 Maret 2025


Purwadi, 

Sari Indah Setiani, 

Adityo Jatmiko, 

Aryo Bimo Setianto, 

Anindito Wisnu Prasetyo. 


Jl Kakap Raya 36 Minomartani Yogyakarta. 

HP 087864404347

Komentar

Posting Komentar

Postingan populer dari blog ini

Babad GKR WANDANSARI

Gambar
 Babad  GKR WANDANSARI Reriptan: Purwadi 1. Dhandhanggula Gusti Kanjeng Ratu Wandansari,  Pangageng ing Sasana Wilapa,  Wiyosan siji Nopember,  Seket sanga kang tahun,  Panjang yuswa ambaling warsi,  Abdi dalem mahargya, Pamuji rahayu,  Lenggah agung binathara,  Wus lestari mbahu dhendha nyakrawati,  Karaton Surakarta.  Gusti Ratu Moertiyah marisi, Lekas luhur Kanjeng Sultan Pajang, Jaka Tingkir Mas Karebet,  Sumare aneng Butuh,  Nyata paring tepa palupi,  Trah Prabu Brawijaya,  Peputra Pembayun,  Dipati Handayaningrat,  Turun Pengging darah luhur tirta wening,  Ngejayeng tanah Jawa.  2. Pangkur Ambeg adil paramarta,  Myang ber budi bawa laksana yekti,  Tangguh tanggon paring dhawuh,  Amemayu bawana,  Gusti Ratu Wandansari amituhu,  Ing Lembaga Dewan Adat,  Wadhah suwita angabdi.  Pasrah Gusti Koes Moertiyah,  Seba sowan mring Ki Ageng Penjawi, Juru Mart...
Baca selengkapnya

Adipati Dayaningrat Pengging Sepuh

Gambar
Adipati Dayaningrat Pengging Sepuh Dr Purwadi, Ketua Lokantara,  HP 087864404347 A. Trah Pengging Kegiatan nyadran berlangsung pada hari Minggu Kliwon, tanggal 2 Pebruari 2025. Bertempat di makam Sri Makurung Handayaningrat di dusun Dukuh desa Malangan kecamatan Banyudono kabupaten Boyolali. Adipati Dayaningrat adalah Bupati Pengging yang terkenal sakti mandraguna.  Kejayaan Majapahit terus berlanjut. Semangat Prabu Brawijaya dalam membangun peradaban diwariskan oleh Ratu Pembayun. Putri sulung Prabu Brawijaya menikah dengan Adipati Sri Makurung Handayaningrat. Jasa Bupati Pengging ini diperingati oleh warga Pakasa, Paguyuban Karaton Surakarta Hadiningrat. Berlangsung pada hari Senin, 18 Juni 2023. Dipimpin oleh Dr KPH Wirabhumi SH, ketua Pakasa. Berkenan memberi sambutan pangageng Sasana Wilapa, Dra GKR Wandansari M.Pd. Turut menyertai GKR Ayu Koes Indriyah. Abdi dalem dan sentana ndherek wilujengan. Wit kepoh merupakan pohon tinggi. Berada di sebelah makam Sri Makurung Handa...
Baca selengkapnya

Asal Usul Leluhur Prabowo Subianto

Gambar
  Asal Usul Leluhur Prabowo Subianto Purwadi,  Ketua Lokantara.  HP 087864404347 I. Keturunan Majapahit.  Prabu Brawijaya raja Majapahit memang pemimpin yang bijak bestari. Membawa kemakmuran, kejayaan dan keemasan bagi sekalian negeri. Rakyat sejahtera lahir batin. Murah sandang pangan papan.  Leluhur Prabowo Subianto ini memang narendra gung binathara mbahu dhendha nyakrawati, ber budi bawa laksana, ambeg adil paramarta, memayu hayuning bawana.  Wajar sekali jiwa kepemimpinan Prabowo ibarat satriya piningit. Pemimpin yang ditunggu tunggu rakyat. Munculnya satriya piningit terjawab saat Prabowo Subianto terpilih menjadi Presiden. Pemilihan umum tanggal 14 Pebruari 2024 berjalan lancar. Rakyat memberi dukungan berlimpah ruah.  Majapahit kerajaan yang agung dan anggun. Tampil sebagai pemimpin notonagoro. Artinya Prabowo Subianto menjalankan dhawuh leluhur. Agar mau mengabdi kepada bangsa dan negara. Lila lan legawa kanggo mulyaning negara.  Notonag...
Baca selengkapnya