Babad Banjarnegara

 Babad Banjarnegara

1.

Kinanthi

Banjarmangu wus tinemu, 

Wiwit jaman Jaka Tingkir, 

Hadijaya Sultan Pajang, 

Ratu Mas Cempaka Sari, 

Trahing raja Kraton Demak, 

Brawijaya Majapahit.

Banjar Petambakan kawruh, 

Wilwatikta Adipati, 

Kalijaga Rasawulan, 

Kyai Ageng Tarub nuli, 

Nawangsih Bondhan Kejawan, 

Peputra Ki Wanasaba. 

Banjarnegara andulu, 

Kyai Ageng Sela siwi, 

Enis Gedhe Pemanahan, 

Panembahan Senapati, 

Sultan Agung Amangkurat, 

Narendra gung ing Mentawis. 

Pangeran Kajor wus dhawuh, 

Dhateng Ratu Wiratsari, 

Katelah Srayu Kencana, 

Mangka garwa prameswari, 

Kanjeng Sunan Amangkurat, 

Banjarmangu bangun yekti. 

2.

Pangkur

Yasa Banjar Petambakan, 

Runtut patut kali Serayu mili, 

Sumengka angganing gunung, 

Nelasak wana alas, 

Munggah mudhun Amangkurat kebak purun, 

Wilayah Kedu tinata,

Nyengkuyung kawula dasih.

Banjarmangu tlatah endah, 

Gagah megah gumregah merak ati, 

Warisan para leluhur, 

Bawah Kraton Mataram, 

Adi luhung tuwuh kagunan ngrembuyung, 

Kawula tata raharja. 

Wisma wastra waras wasis. 

Gemulung Sinar gumelar, 

Banjarmangu ngupakara ngaurip, 

Sambang sambung dunung tepung, 

Gunung Diyeng sarana, 

Amanekung semedi Hyang Maha Agung, 

Mesu budi tapa brata, 

Abdi sentana pinilih. 

Kaloka tlatah minulya, 

Pra bregada alelayar bahari, 

Rikat trampil nyabrang laut, 

Dugi manca nagara, 

Numpak prahu mawi gladhi kawruh ngelmu, 

Pelabuhan gisik Tegal, 

Gemah ripah juru belah. 

Gapura selat Malaka, 

Johor Banjar Aceh Melayu Deli, 

Pelabuhan Tegalarum, 

Pangarsaning samudra, 

Raden Lambung saking Borneo Malambung,

Trah kusuma Kalimantan, 

Priyayi ing Banjarmasin. 

Nama Lambung Mangkurat, 

Setya bekti pangarsa Tegalwangi, 

Sampun purun anenuntun, 

Dedagang juru para, 

Mas jumerut  Martapura awis patut, 

Pawitan bandha lumaksa, 

Arta daya dana picis. 

3.

Durma

Banjarnegara bawah Kraton Mataram, 

Dhawuhe Jaka Tingkir, 

Nata tanah Jawa, 

Lestari Lumaksana, 

Pamanahan Juru Martani, 

Sutawijaya, 

Penjawi saking Pati. 

Anglir mendhung wadya bala wus atata, 

Aglar sami sumiwi, 

Santana arapak, 

Ngagem busana endah, 

Maneka warna tinon asri, 

Kraton Mataram, 

Sadaya pacak baris. 

Sigra mangsah lumampah anut wirama, 

Tambur gong bendhe beri, 

Suling sesauran, 

Trompet munya ngumandhang, 

Kuthagedhe Kerta Plered mring, 

Segarayasa pilih. 

Amangkurat nata agung binathara, 

Wibawa welas asih, 

Grapyak kumawula, 

Susila tata krama, 

Sabarang pakaryan pratitis, 

Hormat sasama, 

Gita gati taberi. 

4.

Asmarandana

Taberi gemi nastiti, 

Banjar Petambakan purna, 

Sepi pamrih rame gawe, 

Ngayahi pakaryan praja, 

Sukeng tyas asung panggagas, 

Wiwit desa kutha gunung, 

Ngirit kawula sentana. 

Segarayasa marsudi, 

Kasudibyan kanugrahan, 

Mangsa labuh mangsa mareng, 

Kali Opak kali Oya, 

Wader badher kehing mina, 

Tapa ngeli tapa kungkum, 

Mesu budi Amangkurat. 

Pendhak warsi mangastuti, 

Pekuncen ing Adiwerna, 

Sagung pamuji pendherek, 

Kapitayan Amangkurat, 

Jroning kapti ngalap berkah, 

Semurup kawula Tarub, 

Trahing Ki Ageng Sela. 

5.

Dhandhanggula

Asma Gusti Raden Mas Sayiddin, 

Raja putra negari Mataram, 

Bagus winasis mentereng, 

Atmaja Sultan Agung, 

Ratu Batang sang prameswari, 

Tedhaking Hupasanta, 

Bupati misuwur, 

Juru Martani Ki Saba, 

Brawijaya Bondhan Kejawan siwi, 

Sela Nis Pemanahan. 

Urutane turun Majapahit, 

Wilwatikta adipati Tuban, 

Rasawulan Magribi Seh, 

Peputra Jaka Tarub, 

Nawangwulan putri Nawangsih, 

Lembu Peteng akrama, 

Asesunu sampun, 

Ki Ageng Getas Pendhawa, 

Wanasaba Sela Kasihan sumiwi, 

Leluhur kraton Jawa. 

Kyai Ageng Sela peputra Nis, 

Turun Kyai Ageng Pemanahan, 

Alas Mentaok pernahe,

Penjawi sabiyantu, 

Handayani Juru Martani, 

Tetruka Ngeksiganda, 

Pulung wahyu ndaru, 

Giring kanugrahan degan, 

Gagak emprit Senapati wus inganggit, 

Danang Sutawijaya. 

Nata mbahu dhendha nyakrawati, 

Raja ber budi bawa laksana, 

Lenggah ing kedhaton Plered, 

Sri Amangkurat Agung, 

Wus sumare ing Tegalwangi, 

Sembada wirotama, 

Sugih bandha bandhu, 

Ambeg adil paramarta, 

Seger bener kober bleger pinter becik, 

Paring tepa tuladha. 

Sunan Amangkurat Tegalwangi, 

Narendra gung Karaton Mataram, 

Lir ganda mlathi  rinonce, 

Angambar wangi arum, 

Wulang wuruk ing Tanah Jawi, 

Lumantar Wali Sanga, 

Gancar mbabar kawruh, 

Wiwit Kraton Demak Pajang, 

Mandhegani murih basuki lestari, 

Karya wosing Wejangan. 

Prameswari nata kaping siji, 

Kanjeng Ratu Mas ing Surabaya, 

Guyub rukun gandheng renteng, 

Pangeran Pekik sunu, 

Wandansari putri Mentawis, 

Wasis manis kawentar, 

Rayi Sultan Agung, 

Apeputra Raden Rahmat, 

Amangkurat Amral anglintir tumuli, 

Kartasura Diningrat. 

6.

Kinanthi

Kawentar ing Banjarmangu, 

ingon ingon kebo sapi, 

Kewan iwen bebek ayam, 

Menthok trowelu kelinci, 

Sakathahing rajajaya, 

Keplek ilat enak gurih. 

Amangkurat Tegalarum, 

Garwa Ratu Wiratsari, 

Putra Pangeran Kajoran, 

Tedhak turun Jaka Tingkir, 

Benawa karaton Pajang, 

Kasusra diddaya sekti. 

Joko Kahiman satuhu, 

Titis wasis samukawis, 

Atmaja Sunan Prawata, 

Kinen jumeneng Bupati, 

Pangarsa tlatah Banyumas, 

Dhawuh raja Jaka Tingkir. 

Kusuma rembesing madu, 

Amangkurat Tegalwangi, 

Anggarwa Ratu Kencana, 

Raden Drajat Banyumanik, 

Sinuwun Paku Buwana, 

Atmaja narpa Mentawis. 

Suwita Pangeran Lambung, 

Miyos saking Banjarmasin, 

Ndherek Sunan Amangkurat, 

Milangkori tanah Jawi, 

Gya nami Lambung Mangkurat, 

Lestari dadya priyayi. 

7.

Mijil

Narendra kagungan emas picis, 

Tlatah sisih kulon, 

Amemangun kedhaton Pamase, 

Banjar Petambakan amemetri, 

Dayane hartati, 

Jeng Ratu Serayu. 

Bupati Banjarmangu makarti, 

Manunggal gumolong, 

Cipta rasa karsa karya gedhe, 

Linambaran pakarti pekerti, 

Banyumas sejati, 

Lila guyub rukun. 

Ngalami jaman kencana rukmi, 

Amangkurat katong, 

Sentana punggawa jero beteng, 

Bumiayu kawula negari, 

Banjar tunggal kapti, 

Amrih sami makmur. 

8.

Gambuh

Boga wastra sadarum, 

Sunan Amangkurat Tegalarum, 

Waras wasis wisma laras laris manis, 

Banjarmangu manggih rahayu, 

Katon maton tanggap tanggon. 

Bangunan saka kayu, 

Ing pangajab pikantuk rahayu, 

Amangkurat Kanjeng Ratu Wiratsari, 

Banyumas tambah ngrembuyung, 

Suka gembira rinaos. 

Gambireng tyas rahayu, 

Tukang mlaku  dagang layar payu, 

Juru tani taliti gemi nastiti, 

Amangkurat paring dhawuh, 

Darapon tumanja awoh. 

9.

Pangkur

Banjarnegara winarna, 

Wonosobo Temanggung ugi, 

Purbalingga

Sumberpucung, 

Sokaraja Banyumas, 

Gandrungmangun Amangkurat gya ambangun, 

Kulonprogo Pemalang, 

Kendal Batang Tegal Slawi. 

Pabrik trasi Lasem Rembang, 

Pirang pirang kondhang belah pesisir, 

Wegig pelabuhan laut, 

Amangkurat mranata, 

Kanjeng Ratu kersa udhu bahu suku, 

Pasaran manca negara, 

Dugi Samudra Pasai. 

Sampun kocap pabrik kecap, 

Madeg jejeg mapan neng Purwodadi, 

Kedhele Ngawi Madiun, 

Tuban Lamongan Blora, 

Ponorogo Blitar Nganjuk Tulungagung, 

Trenggalek Sragen Pacitan, 

Bojonegoro Kediri. 

Bupati Banjarnegara, 

Golong gilig arsa mbangun negari, 

Dhawuh Amangkurat Agung, 

Nuhoni Ratu Kencana, 

Mrih rahayu iline kali Serayu, 

Angocori sawah sawah, 

Tela pohung jagung pari. 

Pelabuhan Tanjung Perak, 

Amangkurat anggagas Surabangi, 

Ternate Bugis Maluku, 

Tidore Bali Banjar, 

Deli Serdang Palembang Bangka Belitung, 

Cirebon Banten Sumedang, 

Lampung Siak Indragiri. 

10.

Asmarandana

Banjarmangu milangeni, 

Jiwa Banjar Petambakan, 

Tekat waja wegig rame, 

Rinumpaka rinakit anggit rinacik, 

Seger sumyah dhawet ayu, 

Timbangane ngelih ngelak. 

Kanjeng Ratu Wiratsari, 

Prameswari Amangkurat, 

Yasa Kedhaton Pamase, 

Banjarmangu Purbalingga, 

ing Lesmana Ajibarang, 

Mahargya Ratu Serayu, 

Kadang tani among dagang. 

Dumugi Rembang pesisir, 

Pelabuhan dagang layar, 

Selat Malaka Tamasek, 

Banjar Aceh Deli Serdang, 

Ternate Bugis Makassar, 

Tidore Ambon Maluku, 

Cirebon Banten Pasundan. 

Kawentar bakul martabak, 

Raos eca warung Tegal, 

Soto seger bumbu sate, 

Banjarmangu Petambakan, 

Lelana dodol panganan, 

Regane murah misuwur, 

Pasugatan kang prasaja. 

11.

Pucung

Dhawet ayu tuku aneng Banjarmangu,

Banjar Petambakan, 

Banjarnegara nyekseni, 

Prameswari nata agung binathara. 

Tlatah timur tani dagang tambah makmur, 

Probolinggo Malang, 

Pasuruan Jombang Gresik, 

Amangkurat narendra gung mider ing rat. 

Alun alun papan amba kebak purun, 

Aneng Purwakerta, 

Among dagang laris manis, 

Amangkurat paring cahya kang sumirat. 

Tani maju perenging gunung Semeru, 

Malang Pasuruan, 

Probolinggo Banyuwangi, 

Situbondo lumajang Jember weh terang. 

Gunung Lawu sanana mesu lelaku, 

ing Kali Ketangga, 

Amangkurat tapa ngeli, 

Sri narendra tarak brata lara lapa. 

12.

Megatruh

Sarwa luhur Banjarmangu pancen subur, 

Kabawah kraton Mentawis, 

Raja Amangkurat Agung, 

Sarta Ratu Wiratsari, 

Pura Pamase mencorong. 

Manggis dulu seger buger padha tuku, 

Bener cocok enak gurih, 

Angrembuyung pereng gunung, 

Suka lila kadang tani, 

Tandur subur aweh awoh.

Banjar Petambakan urut gunung patut, 

Banyu mili aneng kali,

Gunung Diyeng margi hayu, 

Marembes ing tegal sabin,

Gemah ripah jinawi loh. 

13.

Pucung

Desa gunung seni tumangkar ngrembuyung, 

Banjar Petambakan, 

Kanjeng Ratu Wiratsari, 

Amangkurat nata agung hayuningrat. 

Laris payu pakaryan pereng Serayu, 

Warga pegunungan, 

Gumelem tansah makarti, 

Setya darma labuh labet marang praja. 

Banjarmangu sampun nyumbang bahu suku, 

Tumraping bebrayan, 

Gotong royong tandang kardi,

Suka lila ngesti mulya tata praja. 

14.

Kinanthi

Dhawet ayu Banjarmangu, 

Kinclong kinclong sarwa bening, 

Kanjeng Sunan Amangkurat, 

Sesarengan prameswari, 

Nyawang gunung Slamet endah, 

Banjarnegara marsudi. 

Pasir wukir panjang punjung, 

Kawula praja Mentawis, 

Amangkurat kalokengrat, 

Kanjeng Ratu Wiratsari, 

Ngudi dagang pelayaran, 

Lumampah pambelah gisik. 

Banjarnegara andulu, 

Jangkah jangkaning ngaurip, 

Timbang anut ing kabisan,

Among dagang juru tani, 

Suwita marang negara, 

Nara praja lan prajurit. 

15.

Pangkur

Tekan Banjar Petambakan, 

Papan sumber emas kencana rukmi, 

Nata Amangkurat Agung, 

Wiratsari kang garwa, 

Paring dhawuh mrih Banyumas wutuh tangguh, 

Kuwat drajat pangkat semat, 

Sugih bandha bandhu budi. 

Bregada jurit samudra, 

Pilih tanding madyaning jalanidhi, 

Mundhut piranti perahu, 

Nadyan reregan larang, 

Reksa laut suradhadhu baut patut, 

Silem gladhening layaran, 

Prigel trampil olah warih. 

Ngedhep mantep sade boga, 

Rega murah nanging rasane gurih, 

Grapyak penak kehing bakul, 

Mersudi arta daya,

Bisa untung Banjarmangu ngerti petung, 

Tuna santak bathi sanak, 

Banjarmangu tliti gemi. 

16.

Pucung

Banjarmangu wilayah wangsul dinangu, 

Temanggung Magelang, 

ing Pemalang Tegalwangi, 

Amangkurat mandhegani sagung rakyat. 

Ing Serayu kali ayu lan rahayu, 

Sunan Amangkurat, 

Tapa kungkum tapa ngeli, 

Mesu jiwa anoraga cipta rasa. 

Numpak prahu tengah laut sigra laju, 

Aneng pelabuhan, 

Rumeksa wadya prajurit, 

Tata bala olah gelaring samudra. 

Jamak lamun pra leluhur anenuntun, 

Banjarmangu Tegal, 

Mula solahing pambudi, 

Paripurna teteg ajeg amakarya. 

17.

Sinom

Garwa dalem Amangkurat, 

Kanjeng Ratu Wiratsari, 

Katelah Ratu Kencana, 

Tedhak turun Jaka Tingkir, 

Nyata putri linuwih, 

Sinebut Ratu Serayu, 

Mbangun nagri Mataram, 

Gemah ripah loh jinawi, 

Purwokerto menyang Banjar Petambakan. 

Tata praja ing negara, 

Ngasta permana permati, 

Kanjeng Sunan Amangkurat, 

Ngereh sagung adipati, 

Wetan kulon pesisir, 

Laladan samudra kidul, 

Winengku tata cara, 

ingukir lendheping pikir, 

Pra kawula cukup sandhang wisma boga. 

Sinau dagang layaran,

Gulawenthah jalanidhi, 

Papan Bumiayu  Tegal, 

Kawentar laut bahari, 

Angrengga papan gisik,

Apadene gethek prahu, 

Pirantine wisata, 

Sesawangan kinclong asri, 

Amangkurat wus ambangun kalokengrat. 

18.

Maskumambang

Bungah susah yekti gawane ngaurip, 

Banjarnegara winarah, 

Mersudi luhuring budi, 

Suwita Kraton Mataram. 

Abdi dalem sampun tampi dana dhuwit, 

Bungah turah arta daya,

Marem ayem jroning kapti, 

Narendra nyata sembada. 

Tlatah Banjarmangu njajah desa milangkori, 

Gerbang lawang nusantara, 

Dugi Samudra Pasai, 

Temasek Banjar Malaka. 

19.

Durma

Tuking rukmi warta Banjar Petambakan, 

Rajabrana mas picis, 

Sumber penghasilan, 

Tumrap praja Mataram, 

Mbudidaya Sri Wiratsari, 

Sri Amangkurat, 

Mersudi pala karti.

Gunung Kendheng gunung Renteng gunung Pandhan, 

Sumbering minyak bumi, 

Mubal lenga patra, 

Temayang Jepun Tuban, 

Lumaku budidaya nuli, 

Cerak bengawan, 

Tilel sakehing bathi. 

Nyambut gawe tandang karya kehing jalma, 

Lumaku wira wira, 

Ing sadhengah papan, 

Pamrihe kasembadan, 

Tata titi gilir gumanti, 

Ndherek pernatan, 

Bebrayan hayu lestari. 

19.

Gambuh

Banjarmangu lumaku, 

Dumalidir tani dagang payu, 

Payung agung ngrembuyung rejeki, 

Amangkurat Tegalarum, 

Pepundhen mangka pengayom. 

Papan kidul pununjul, 

Gunung Slamet agung kaya payung, 

Ambawahi wilayah Banyumas kang peni, 

Amangkurat terus ambangun, 

Sigrak gumyak gotong royong. 

Tambah makmur sempulur 

Minyak tanah mapan ing sumur bur, 

Kanan kiri tanem tuwuh kayu jati, 

Perkutut ocehing patut, 

Prabeya praja gumrojog. 

Patut mbangun miturut, 

Garap runtut wekasane urut, 

Ngati ngati kinarya tepa palupi, 

Wedharane ngelmu laku, 

Banjarnegara kelakon. 

22.

Pangkur

Banjarnegara prasaja,  

Angrumpaka kabudayan inganggit, 

Tapa ngeli tapa kungkum, 

Gunung Slamet kinarya, 

Alelaku amrih lantip jroning kalbu, 

Minangka abdi narendra, 

Darma bakti nusa bangsa. 

Jeng Pangeran Kajor kocap, 

Sentana kang sugih inten mas picis, 

Bandha bandhu tanah mbrewu, 

Tedhak Pangeran Benawa, 

Wus misuwur trah Pajang kang makmur, 

Wiratsari ingkang putra, 

Ginarwa Sri Tegalwangi. 

Kutha praja Kartasura, 

Amangkurat Amral titi patitis, 

Tumpuk undhung mas jumerut, 

Mangka bandha negara, 

Sami udhu lumintu sajuru juru, 

Juru tani among dagang, 

Untung bathi mbanyu mili. 

22.

Dhandhanggula

Guru bangsa mbabar wiyatadi, 

Kawentar Pangeran Karanggayam, 

Saking wilayah Kebumen, 

Pituduh barang kawruh, 

Paugeran tata negari, 

Peprentahan bebrayan, 

Pandoming pandulu, 

Jeng Sultan Hadiwijaya, 

Paring dhawuh murih rahayu lestari,  

Pujangga Kraton Pajang. 

Ludruk kentrung kethoprak wigati, 

Wayang gamelan terus ngembaka, 

Joged tembang mekar gedhe, 

Jathilan reyog tayub, 

Jaran kepang sigrak ngangeni, 

Kawula gambireng tyas, 

Ayem guyub rukun, 

Tontonan tuntun tatanan, 

Guna seni aweh seneng saben jalmi, 

Warata saknegara.

Banjar Petambakan tandang kardi, 

Sakparan paran sami bakulan, 

Gumreget gumregah rame, 

Padha sengkut gumregut, 

Bumiayu Brebes marsudi, 

Angrampungi pakaryan, 

Temen bakal temu, 

Sembada ingkang kajangka,

Siyang ratri ngupaya lelana dhiri, 

Temah awoh kamulyan.

23.

Pangkur

Kaloka Sri Ratu Batang, 

Ing Mataram minangka prameswari, 

Garwanipun Sultan Agung, 

Miyos Sri Amangkurat, 

Sampun purun tlatah Banyumas binangun, 

Narendra gung binathara, 

Mbahu dhendha nyakrawati. 

Manggih jaman keemasan, 

Kanjeng Sunan Amangkurat mersudi, 

Sinartan Ratu Serayu, 

Mranata pra kawula, 

Gancar lancar urip urup subur makmur, 

Cekap cukup cukap cakap, 

Enjang sonten siyang ratri. 

Banjarmangu mbudidaya, 

Darma bakti sarana purun ngrukti,

Warisan ingkang kapungkur, 

Kadya sejarah babad, 

Asih asuh asah sihing tedah tuduh, 

Tumraping warga bebrayan, 

Wusnya dangu angleluri. 

24.

Kinanthi

Lumaksana Banjarmangu, 

Toya rumembes amili,

Bebek menthok banyak ayam, 

Menda kuda kebo sapi, 

Gemrayah alambah kathah,

Angayom Kraton Mentawis. 

Kanjeng Ratu Mas Serayu, 

Pinilih putri linuwih, 

Atmaja Joko Kahiman, 

Hupasanta  malakrami, 

Miyos Kanjeng Ratu Batang, 

Sultan Agung ing Mentawis. 

Nata Kanjeng Sultan Agung, 

Amangkurat Tegalwangi, 

Amangkurat Amral, 

Paku Buwana siji, 

Sunan Amangkurat Emas, 

Sinuwun Mangkurat Jawi. 

Prayogane murid guru, 

Sami kersa amastuti, 

Dhawuhe para sarjana, 

Sujana budi winasis, 

Ajaran Sri Amangkurat, 

Sumare ing Tegalwangi. 

25.

Dhandhanggula

Banjarmangu kinarya palupi, 

Labuh labet raja Amangkurat, 

Yasa Kedhaton Pamase, 

Sayekti tangguh ampuh, 

Mbangun jaman kencana rukmi, 

Lesmana Ajibarang, 

Pancurendhang mancur, 

Emas picis rajabrana, 

Bandha bandhu budi linangkung utami, 

Kanjeng Ratu Kencana.

Kanjeng Panembahan Senapati, 

Paring tuladha kagem wong Jawa, 

Aneng dhatulaya bale, 

Ganti Sinuwun Prabu , 

Nyakrawati wus menggalih, 

Murih bagya minulya , 

Kagem anak putu, 

Lumaksana gya makarya, 

Gemi tliti ngati ati barang kardi, 

Amangkurat Mataram. 

Sampun kondhang pertiwi wiyati,

Banjar Petambakan

Nggenya purna karya, 

Sepi pamrih rame gawe, 

Guna kaya lan purun, 

Karya conto Raden Sumantri, 

Kamot serat tripama, 

Wacan becik tugu, 

Kagem punggawa negara, 

Kumbakarna Bupati Ngawangga ugi, 

Lahir batin suwita.

26.

Maskumambang

Banjarnegara wus sami anekseni,

Kawula praja Mataram, 

Pinanggih wibawa mukti, 

Widada suka gembira. 

Panjang punjung gemah ripah loh jinawi, 

Ayem tentrem karta harja, 

Amangkurat Tegalwangi, 

Negara arum kuncara. 

Banjarmangu nyata

sarwa becik, 

Wilayah ingkang kawentar, 

Amangkurat Tegalwangi, 

Kinarya tepa tuladha. 

27.

Gambuh

Sowan ing Banjarmangu, 

Tani maju dagang bakul payu, 

Mandhegani Amangkurat Tegalwangi 

Ngupakara mas jumerut, 

Brebes bandha ber gumrojog. 

Banjarmangu miturut, 

Pikir runtut urut pantes patut, 

Pinandhegan Amangkurat prameswawi, 

Ratu Mas Ratu Serayu, 

Kawulane gendhon rukon. 

Banjarnegara kayun,

Tanah manca kabeh dha kayungyun, 

Bumi Plered endah asri milangeni, 

Tlatah Bantul cahya mantul, 

Gumreget gregah gumolong. 

Banjarmangu anggayuh, 

Datan lumuh nrajang kehing kewuh, 

Binarunging Sultan Pajang Senapati, 

Mumbul unggul ing pinunjul, 

Bumi ing Alas Mentaok. 

Banjarmangu sadarum,

Pandam pandom pandulune pandum, 

Ngestu pada raja putra ing Mentawis, 

Urun bahu suku lan panemu, 

Sopan santun andhap asor. 

28.

Pucung

Desa gunung gotong royong lung tinulung, 

Dhawuh Amangkurat, 

Kanjeng Ratu Wiratsari, 

Mbahu dhendha nyakrawati pra kawula. 

Pucuk gunung mesu budi bisa dunung, 

Dalan kebecikan,

Sri Mangkurat Tegalwangi, 

Sung tuladha tumrap jalma tanah Jawa. 

Jeng Sinuwun amaringi sawabipun, 

Tumrap putra wayah, 

Boga wastra wisma wasis,

Bagas waras panjang yuswa laris laras. 

Murid guru Banjarmangu amituhu, 

Wignya jaman kuna, 

Kababar mawa tinulis, 

Padhang terang wedharan sastra piwulang.

Banjarmangu suka sukur weh rahayu, 

Widada wibawa, 

Gemah ripah loh jinawi, 

Panjang punjung pasir wukir karta harja. 

Purwadi, 

Universitas Negeri Yogyakarta