Fadli Zon Pamong Kraton Surakarta

 Fadli Zon Pamong Kraton Surakarta



1.

Dhandhanggula


Prof Fadli Zon minangka Menteri, 

Kewajiban praja wus sumandhang, 

Gita gita tandang gawe, 

Tetela karya agung, 

Kebudayaan den pepetri, 

Surakarta Diningrat, 

Siyaga binangun, 

Cagar budaya rineksa, 

Gya katiti tedhak pambudi wigati, 

Lambaran wicaksana. 


Tata cara kapyarsa katitik, 

Jumenengan nata Surakarta,

Nglungsur dhampar retna jene, 

Mangka Kanjeng Sinuwun, 

Sunan Paku Buwana nenggih, 

Ingkang ping kawan welas, 

Santana sarujuk, 

Kawula mangayu bagya,

Raja Putra Mataram

Pangeran Pati, 

Fadli Zon premana. 


Panca paksi wiyati dwi warsi,

Sinengkalan konjuk Sri Narendra, 

Fadli Zon mirsani age, 

Sumingkir barang kewuh, 

Pak Menteri mawas permati, 

Tatas wohing panggagas, 

Kalampahan sampun, 

Tata cara kanarendran,

Tata titi sigra jumeneng narpati, 

Sunan Paku Buwana. 


2.

Pangkur


Ing Sasana Handrawina, 

Pra winasis arum manis ngembani, 

Kanjeng sentana sadarum, 

Lembaga Dewan Adat, 

Paring dhawuh miturut sakeh pituduh, 

Angger angger paugeran, 

Prof Fadli Zon mung  tut wuri. 


Gancar lancar gya kababar, 

Kanjeng Gusti Pangeran Sri Narpati, 

Sami njunjung mawi petung, 

Sunan Paku Buwana, 

Narendra gung Prof Fadli Zon anyengkuyung, 

Ber budi bawa laksana, 

Mbahu dhendha nyakrawati. 


3.

Pucung


Jroning kalbu Prof Fadli Zon amituhu, 

Anut paugeran, 

Lembaga Adat mengkoni, 

Bakti darma Surakarta mrih kuncara. 


Unjuk atur Dewan Adat mring leluhur, 

Enggal marak sowan, 

Pajimatan Imogiri, 

Ing pangangkah

Prof Fadli Zon ngudi berkah. 


4.

Gambuh


Fadli Zon kulak butuh, 

Surakarta tuk sumbering kawruh, 

Tanah Jawi ngrenggani ibu pertiwi, 

Kanjeng Sinuwun ing ngayun, 

Mranata punggawa Kraton. 


Jumangkah bareng maju, 

Lembaga Dewan Adat anuju, 

Amarsudi gawa gawe edi peni, 

Seserep urup sumurup, 

Prof Fadli Zon trus anonton. 


5.

Kinanthi


Lumaku kanthi rahayu, 

Lembaga Adat miyarsi, 

Sinuwun Paku Buwana, 

Kawan welas wusnya prapti, 

Titi mangsa kawisuda, 

Prof Fadli Zon nayogyani. 


Ndherek suwita kayungyun, 

Pepoyaning mesu budi, 

Wadhahing Lembaga Adat, 

Sareng ajar pamrayogi, 

Ngupakara dhatulaya, 

Prof Fadli Zon ngawekani. 


6.

Mijil


Ing madyaning pura jalanidhi, 

Punjering kedhaton, 

Saka Dhomas ing Mutyara Bale, 

Kanjeng Ratu Sri Kencana Sari, 

Kepareng ngestreni, 

Prof Fadli Zon hayu. 


Sri Narendra mahas ing ngasepi, 

Ngudi karahayon, 

Panggung Sangga Buwana papane, 

Anggegampil lenggah saluku satunggil, 

Angsal drajat inggil, 

Fadli Zon nyengkuyung. 


7.

Asmaradana


Prof Doktor Fadli Zon nliti,  

Kanjeng Sinuwun ngibadah, 

Tumuju ing Masjid Gedhe, 

Mangka dadi srana sarat, 

Tumrap narendra Mataram, 

Sholat Jumat kaping pitu, 

Takmir ngulama jamaah. 


Khalifahtullah Agami, 

Sayidina Ngabdurrahman, 

Ngamal ngelmi trap trapane, 

Senapati ing Ngalaga, 

Kanjeng Sri Paku Buwana, 

Cerak muhung Masjid Agung, 

Prof Fadli Zon mbudidaya. 


8.

Durma


Patuh taat lan Lembaga Dewan Adat, 

Sarana darma bakti, 

Santana pangarsa, 

Abdi dalem kawula, 

Prof Fadli Zon sung pamanggih, 

Tata negara, 

Pemerintah Republik. 


Pak Menteri Kabudayan sung teladhan,

Sajroning NKRI, 

Mula Dewan Adat, 

Ngarah arah lumampah, 

Laras laris lurus lumaris, 

Kabar kababar, 

Hukum kanthi permati. 


9.

Megatruh


Warta unggul Mentri Fadli Zon pinunjul, 

Yasadipura ping siji, 

Hasta brata sung wewuruk, 

Tumraping sagung narpati, 

Dimen minulya mencorong. 


Sri narendra prayoga  paring sesuguh, 

Grapyak sigrak sandhang sandhing, 

Sambang sambung tulung srawung, 

Pak Menteri anelahi, 

Momor momong mring sang katong. 


10.

Sinom


Setya saraya rumeksa, 

Prof Fadli Zon

asesanti, 

Pambiwara lumaksana, 

Pasipamarta pertitis, 

Suwita aris manis, 

Bebantu ing rinten dalu, 

Kadang rewang tuguran, 

Tata lahir tandang kardi,

Narapraja Fadli Zon lila legawa.  


Paheman Narpa Wandawa, 

Putri Narpa mastuti, 

Pakempalan kasentanan, 

Mandra Budaya marsudi, 

Kartipraja makarti, 

Kebon Darat guyub rukun, 

Ngayahi kewajiban, 

Suka lila lahir batin, 

Prof Fadli Zon Menteri cukup sembada. 


11.

Maskumambang


Pak Menteri Fadli Zon rinengga manis, 

Abdi dalem Surakarta, 

Sukeng tyas pasuryan bening, 

Ngayahi tugas negara. 


Bagya mulya pamomong narpati,

Sri Sunan Paku Buwana, 

Pak Prof Fadli Zon nglenggahi, 

Mangka Mentri Kabudayan. 



Kemis Paing, 19 Pebruari 2026.

Purwadi

Komentar

Posting Komentar

Postingan populer dari blog ini

Babad GKR WANDANSARI

Gambar
 Babad  GKR WANDANSARI Reriptan: Purwadi 1. Dhandhanggula Gusti Kanjeng Ratu Wandansari,  Pangageng ing Sasana Wilapa,  Wiyosan siji Nopember,  Seket sanga kang tahun,  Panjang yuswa ambaling warsi,  Abdi dalem mahargya, Pamuji rahayu,  Lenggah agung binathara,  Wus lestari mbahu dhendha nyakrawati,  Karaton Surakarta.  Gusti Ratu Moertiyah marisi, Lekas luhur Kanjeng Sultan Pajang, Jaka Tingkir Mas Karebet,  Sumare aneng Butuh,  Nyata paring tepa palupi,  Trah Prabu Brawijaya,  Peputra Pembayun,  Dipati Handayaningrat,  Turun Pengging darah luhur tirta wening,  Ngejayeng tanah Jawa.  2. Pangkur Ambeg adil paramarta,  Myang ber budi bawa laksana yekti,  Tangguh tanggon paring dhawuh,  Amemayu bawana,  Gusti Ratu Wandansari amituhu,  Ing Lembaga Dewan Adat,  Wadhah suwita angabdi.  Pasrah Gusti Koes Moertiyah,  Seba sowan mring Ki Ageng Penjawi, Juru Mart...
Baca selengkapnya

Kidung Idul Fitri

Gambar
 Kidung Idul Fitri Perangan 1 Kupat Idul Fitri 2025 1. Dhandhanggula Konjuk dhateng Panjenengan sami, Kula Purwadi lan Sari Indah,  Dalah anak sedayane,  Adityo kang rumuhun,  Aryo Bimo kang nomer kalih,  Anindito ketiga,  Pareng unjuk atur,  Bagya mulya hari raya,  Idul fitri nyuwun gunging pangaksami,  Lahir batin sumarah. Sami eling dinten Senin Paing,  Telu siji Maret gya lumampah,  Tahun rong ewu selawe,  Mahargya wanci agung,  Manggih riyaya idul fitri,  Winastanan lebaran,  Suwara gumuruh, Ngumandhang ing awang awang,  Tahlil takbir tahmid tasbeh dikir,  Pasa Ramadhan purna.  2. Megatruh Minal aidin wal faidin umatur,  Pangapura lahir batin,  Bapak ibu para sepuh, Kangmas mbakyu adhik adhik,  Jawat asta amiraos.  Pulang kampung lumaksana turut lurung, Saking kutha hilir mudik,  Desa sejatine hulu,  Pralampita wong ngaurip,  Saguh momong momor momot. 3. Miji...
Baca selengkapnya

Adipati Dayaningrat Pengging Sepuh

Gambar
Adipati Dayaningrat Pengging Sepuh Dr Purwadi, Ketua Lokantara,  HP 087864404347 A. Trah Pengging Kegiatan nyadran berlangsung pada hari Minggu Kliwon, tanggal 2 Pebruari 2025. Bertempat di makam Sri Makurung Handayaningrat di dusun Dukuh desa Malangan kecamatan Banyudono kabupaten Boyolali. Adipati Dayaningrat adalah Bupati Pengging yang terkenal sakti mandraguna.  Kejayaan Majapahit terus berlanjut. Semangat Prabu Brawijaya dalam membangun peradaban diwariskan oleh Ratu Pembayun. Putri sulung Prabu Brawijaya menikah dengan Adipati Sri Makurung Handayaningrat. Jasa Bupati Pengging ini diperingati oleh warga Pakasa, Paguyuban Karaton Surakarta Hadiningrat. Berlangsung pada hari Senin, 18 Juni 2023. Dipimpin oleh Dr KPH Wirabhumi SH, ketua Pakasa. Berkenan memberi sambutan pangageng Sasana Wilapa, Dra GKR Wandansari M.Pd. Turut menyertai GKR Ayu Koes Indriyah. Abdi dalem dan sentana ndherek wilujengan. Wit kepoh merupakan pohon tinggi. Berada di sebelah makam Sri Makurung Handa...
Baca selengkapnya