WIYOSAN DANDANG KYAI DHUDHA

 WIYOSAN DANDANG KYAI DHUDHA




1.

Dhandhanggula


Wiyosan dandang pusaka tanah Jawi, 

Winursita dandang Kyai Dhudha, 

Warna cemeng biru jene,

Jaman Ki Ageng Tarub, 

Nawangwulan Dewi Nawangsih, 

Widodari Kahyangan, 

Tedhak turun ratu, 

Getas Pendhawa Ki Sela, 

Kyai Enis Pemanahan Senapati, 

Leluhure Mataram. 


Wanci Jumah Kliwon  wus pinesthi, 

Wilujengan konjuk Kyai Dhudha, 

Sasana Karaton Kilen, 

Tata cara lumaku, 

Sarwa putih warna pinilih, 

Abdi dalem sentana, 

Lima tanggalipun, 

September slawe warsa, 

Mesu budi tunggal ciptaning pangesthi, 

Amiwiti gawe adang. 


Slasa Legi sigra murwakani, 

Tata cara pawon gondorasan, 

Jangkep genep uba rampe, 

Tanggal rolas Agustus, 

Tahun slawe abdi makarti, 

Lenggah saluku juga, 

Tur Ki Ageng Tarub, 

Leluhure Surakarta, 

Kanjeng Gusti Ratu Wandansari niti,

Pusaka Kyai Dhudha. 


2.

Pangkur


Yasa pawon gondorasan, 

Abdi dalem sentana tandang kardi,

Anut tataning leluhur, 

Karaton Surakarta, 

Kayat kayun krana rahayu kayungyun, 

Loh jinawi gemah ripah, 

Pasir wukir panjang punjung. 


Setu Paing adicara, 

Kyai Dhudha miyos karya makarti, 

Enjang kapyarsa gumuruh, 

Karaton Surakarta, 

Kapinuju pawon gondorasan tuhu, 

Pangarsa sagung sentana, 

Angiring puji hastuti. 


3.

Kinanthi


Paugeran Kyai Tarub, 

Pepundhene tanah Jawi, 

Kuwat drajat pangkat semat, 

Jiwa raga sarwa becik, 

Lebda ber bandhu ber bandha, 

Titis wasis samukawis. 


Kusuma rembesing madu, 

Wilwatikta Adipati, 

Bupati wilayah Tuban, 

Wicaksana surasakti, 

Apeputra Rasawulan, 

Kyai Tarub asesiwi. 


4.

Durma


Tedhak turun wayah Kyai Ageng Sela, 

Wutun sregep martani, 

Tanem tuwuh sawah,

Alembah kathah mbruwah, 

Subur makmur jagung lan pari, 

Ngrembuyung pala, 

Ayem tentrem lestari. 


Raden Sahid Kanjeng Sunan Kalijaga, 

Atmaja adipati, 

Tuban Wilwatikta, 

Sang raka Rasawulan, 

Momong Kyai Tarub gemati, 

Tepa tuladha, 

Sanggya trahing narpati. 


5.

Maskumambang


Wus lumaku jaman Kraton Majapahit, 

Demak Pajang lan Mataram, 

Kyai Dhudha kang wigati, 

Murih manggih karaharjan. 


Bondhan Kejawan atmaja Majapahit, 

Sinuwun Brawijaya, 

Palakrama lan Nawangsih, 

Sesunu Getas Pendhawa. 


6.

Pucung


Gelung sanggul kebayak wanita unggul, 

Jarik sida mulya, 

Rinengga samir bang kuning, 

Weh perbawa kehing puja kinabulna. 


Gya lumaku Getas Pendhawa sesunu, 

Kyai Wanasaba, 

Rara Kasihan pawestri, 

Kyai Sela nurunake raja Jawa. 


7.

Mijil


Binarung siliring angin midhit, 

Miyak witing godhong, 

Kidungan donga nuli kemlawe, 

Kraton Kilen kebak ing pamuji, 

Tumraping negari, 

Pinanggih rahayu. 


Kyai Wanasaba trah priyayi, 

Bibit bebet bobot, 

Kadi dene inten mas rinonce, 

Kaloka nami Juru Martani, 

Sabinah linuwih, 

Pangarsa Mentarum. 


8.

Asmarandana


Mligi kagem among tani, 

Tanah subur tegal sawah, 

Guyub rukun gandheng renteng, 

Palagantung palawija, 

Palapendhem palasimpar,

Pari tela jagung puhung, 

Nemahi gemah raharja. 


Rara Kasihan ketitik, 

Becik garwa Kyai Ngerang, 

Kondhang dadi kembang lambe, 

Ki Ageng Penjawi putra, 

Tumanak Ratu Waskitha, 

Prameswari narendra gung, 

Sri Danang Sutawijaya. 


9.

Megatruh


Sigra kabur kehing hama ilang mabur, 

Musna tumuju wiyati, 

Kyai Dhudha saben windu, 

Jeng Sinuwun cethik geni, 

Gondorasan nama pawon. 


Senapati Nyakrawati Sultan Agung, Amangkurat siji dwi tri, 

Paku Buwana rumuhun, 

Mangkurat Jawi kesohor. 


10.

Sinom


Sowan bangsal parasedya, 

Kyai Blawong wus cumawis, 

Kinarya dum duman sega, 

Wujude pusaka piring, 

Lurah mantri bupati, 

Wiwit esuk umun umun, 

Bujana andrawina, 

Pacak baris tinon asri, 

Parisuka pinaringan dhahar sega.


Duking babat kutha Sala, 

Praba Suyasa lumaris, 

Pindhah saking Kartasura, 

Dhateng Surakarta nagri, 

Prajurit pacak baris, 

Parab Kanjeng Sunan Kombul, 

Narendra binathara, 

Mbahu dhendha nyakrawati, 

Ambel adil ber budi bawa laksana. 


11.

Gambuh


Tata cara sewindu, 

Kyai Tarub maringi sumurup, 

Sagung jalmi gumelaring tanah Jawi, 

Emas picis bandha bandhu, 

Ayem tentrem lahir batos. 


Ndherek lekasing ratu, 

Kyai Dhudha pinundhi lumintu, 

Amberkati sakehing sagung dumadi, 

Lelana samya lelaku, 

Tamat lulusing lelakon. 



Setu Paing, 6 September 2025.

Purwadi, 

Ketua Lokantara

Komentar

Posting Komentar

Postingan populer dari blog ini

Babad GKR WANDANSARI

Gambar
 Babad  GKR WANDANSARI Reriptan: Purwadi 1. Dhandhanggula Gusti Kanjeng Ratu Wandansari,  Pangageng ing Sasana Wilapa,  Wiyosan siji Nopember,  Seket sanga kang tahun,  Panjang yuswa ambaling warsi,  Abdi dalem mahargya, Pamuji rahayu,  Lenggah agung binathara,  Wus lestari mbahu dhendha nyakrawati,  Karaton Surakarta.  Gusti Ratu Moertiyah marisi, Lekas luhur Kanjeng Sultan Pajang, Jaka Tingkir Mas Karebet,  Sumare aneng Butuh,  Nyata paring tepa palupi,  Trah Prabu Brawijaya,  Peputra Pembayun,  Dipati Handayaningrat,  Turun Pengging darah luhur tirta wening,  Ngejayeng tanah Jawa.  2. Pangkur Ambeg adil paramarta,  Myang ber budi bawa laksana yekti,  Tangguh tanggon paring dhawuh,  Amemayu bawana,  Gusti Ratu Wandansari amituhu,  Ing Lembaga Dewan Adat,  Wadhah suwita angabdi.  Pasrah Gusti Koes Moertiyah,  Seba sowan mring Ki Ageng Penjawi, Juru Mart...
Baca selengkapnya

Adipati Dayaningrat Pengging Sepuh

Gambar
Adipati Dayaningrat Pengging Sepuh Dr Purwadi, Ketua Lokantara,  HP 087864404347 A. Trah Pengging Kegiatan nyadran berlangsung pada hari Minggu Kliwon, tanggal 2 Pebruari 2025. Bertempat di makam Sri Makurung Handayaningrat di dusun Dukuh desa Malangan kecamatan Banyudono kabupaten Boyolali. Adipati Dayaningrat adalah Bupati Pengging yang terkenal sakti mandraguna.  Kejayaan Majapahit terus berlanjut. Semangat Prabu Brawijaya dalam membangun peradaban diwariskan oleh Ratu Pembayun. Putri sulung Prabu Brawijaya menikah dengan Adipati Sri Makurung Handayaningrat. Jasa Bupati Pengging ini diperingati oleh warga Pakasa, Paguyuban Karaton Surakarta Hadiningrat. Berlangsung pada hari Senin, 18 Juni 2023. Dipimpin oleh Dr KPH Wirabhumi SH, ketua Pakasa. Berkenan memberi sambutan pangageng Sasana Wilapa, Dra GKR Wandansari M.Pd. Turut menyertai GKR Ayu Koes Indriyah. Abdi dalem dan sentana ndherek wilujengan. Wit kepoh merupakan pohon tinggi. Berada di sebelah makam Sri Makurung Handa...
Baca selengkapnya

Kidung Idul Fitri

Gambar
 Kidung Idul Fitri Perangan 1 Kupat Idul Fitri 2025 1. Dhandhanggula Konjuk dhateng Panjenengan sami, Kula Purwadi lan Sari Indah,  Dalah anak sedayane,  Adityo kang rumuhun,  Aryo Bimo kang nomer kalih,  Anindito ketiga,  Pareng unjuk atur,  Bagya mulya hari raya,  Idul fitri nyuwun gunging pangaksami,  Lahir batin sumarah. Sami eling dinten Senin Paing,  Telu siji Maret gya lumampah,  Tahun rong ewu selawe,  Mahargya wanci agung,  Manggih riyaya idul fitri,  Winastanan lebaran,  Suwara gumuruh, Ngumandhang ing awang awang,  Tahlil takbir tahmid tasbeh dikir,  Pasa Ramadhan purna.  2. Megatruh Minal aidin wal faidin umatur,  Pangapura lahir batin,  Bapak ibu para sepuh, Kangmas mbakyu adhik adhik,  Jawat asta amiraos.  Pulang kampung lumaksana turut lurung, Saking kutha hilir mudik,  Desa sejatine hulu,  Pralampita wong ngaurip,  Saguh momong momor momot. 3. Miji...
Baca selengkapnya