KADIPATEN JEPARA

 KADIPATEN JEPARA





KANJENG

RATU KALINYAMAT


1.

Mijil


Kraton Demak Bintara winarni, 

Kalinyamat miyos, 

Sekar kedhaton putri kinacek, 

Kanjeng Sultan Trenggana narpati, 

Garwa prameswari,

Mas Maloka Ratu. 


2.

Pangkur


Garwa Ratu Kalinyamat, 

Priyayi Aceh Pangeran Hadirin, 

Sugih ber bandha ber bandhu, 

Saudagar Malaka, 

Cekap cukup pinter bener wus kacakup, 

Perwira bagus sembada, 

Kraton Samudra Pasai. 


3.

Kinanthi


Kalinyamat amituhu, 

Tepa palupi pra putri, 

Ratu Shima ing Kalingga, 

Ratu Pramodha Wardhani, 

Raja wanita Suhita, 

Tri Bhuwana Tungga Dewi. 


4.

Asmarandana


Kalinyamat mandhegani, 

Bupati tlatah Jepara, 

Saurute pesisir ler, 

Kaloka momong kawula, 

Wegig pangembating praja, 

Wiwit kutha desa dhusun,

Ajrih asih rasa tresna. 


5.

Durma


Rikat cukat terampil lincah trengginas, 

Kalinyamat marsudi, 

Undhaking kaprajan, 

Abdi dalem sentana, 

Golong gilig tumandang kardi,

Rampung pakaryan, 

Warata saknegari. 


6.

Gambuh


Kanjeng Pangeran Timur, 

Adipati Madiun misuwur, 

Kalinyamat momong permati gemati, 

Sayekti rembesing madu, 

Ngleluri wiji keraton. 


7.

Pucung


Unggul kabul   Kalinyamat  kang pinunjul, 

Kersa nggulawenthah, 

Pangeran Onje bupati,

Purbalingga pinanggih tata raharja. 


8.

Maskumambang


Joko Kahiman Banyumas adipati,

Atmaja Sunan Prawata, 

Ratu Emas Jaka Tingkir, 

Dangu ndherek Kalinyamat. 


9.

Megatruh


Greget sengkut anglegena sinjang rambut, 

Kalinyamat nandur becik, 

Pangeran Benawa tuhu,

Ratu Mas Cepaka menggalih, 

Hadiwijaya kesohor. 


10.

Sinom


Sunan Prawata pangarsa, 

Ratu Langgar Sampang kalih, 

Kalinyamat kaping tiga, 

Kapat Inten Hasanuddin, 

Cepaka Jaka Tingkir,

Timur Bupati Madiun, 

Putra Sultan Trenggana, 

Merbawani tanah Jawi, 

Pajang Mataram Kartasura pangeram. 


11.

Dhandhanggula


Kalinyamat pahlawan sejati, 

Tuladha kabupaten Jepara, 

Labuh labet gya sineksen, 

Wis antuk pikukuh, 

Saking pemerintah Republik, 

Ing nopember sedasa,

Tahun telu likur, 

Rakyat sepakat mupangat, 

Siyang ratri asung puji pangastuti, 

Nusantara kuncara.



ADIPATI TJITROSOMO


1.

Dhandhanggula


Tjitrosomo Kanjeng Adipati, 

Pangarsane wewengkon Jepara, 

Misuwur ing pesisir ler, 

Nlesih para leluhur, 

Reksojiwo pangageng inggil, 

Karaton Kartasura, 

Mataram pinunjul, 

Sunan Amangkurat Emas, 

Wus amiji minangka dadya Bupati, 

Mengku nguntara praja. 


2.

Durma


Sendang Kalinyamatan tlatah Jepara, 

Pajimatan bupati, 

Trah Tjitrokusuma, 

Sikti tur mandraguna, 

Titis wasis ing samukawis, 

Dhasar sembada, 

Ngatasi barang kardi.


3.

Megatruh


Pra Tumenggung nyata dadi payung agung, 

Tjitrosomo kaping siji, 

Ngantya Tjitrosomo wolu, 

Run tumurun merbawani, 

Kawula gya geleng golong. 


4.

Maskumambang


Duking timur kawastanan Ki Wuragil, 

Labuh labet marang praja, 

Sunan Amangkurat ping Tri, 

Sampun kersa amisuda. 


5.

Pangkur


Sinuwun Praba Suyasa, 

Purna paring Tjitrosomo kaping dwi,

Nama Adipati Kombul, 

Trampil ukir ukiran, 

Anyengkuyung juru tukang angrembuyung, 

Dumugi manca negara, 

Bandha bandhu luwih sugih. 


6.

Asmarandana


Tjitrokusuma kaping tri,

Ngesuhi bandaran Tuban, 

Tanjung Mas layaran gedhe, 

Lamongan lan Tanjung Perak, 

Tegal Batang Pekalongan, 

Bupati wignya ing butuh, 

Jepara gemah raharja. 


7.

Sinom


Tjitrosomo kaping papat, 

Jalma limpat mitayani, 

Rumeksa sakehing wreksa, 

Gunung Kendheng Alas jati, 

Tjitrosomo lima yekti, 

Mbudidaya lenga cepu, 

Urut kali bengawan, 

Tjitrosomo nem amanggih, 

Pari gaga kuncara ing jagad raya. 


8.

Kinanthi


Tjitrosomo kaping pitu, 

Nggulawenthah semen gamping, 

Jepara murih tumata, 

Wewangunan edi peni, 

Bata watu wus tinata, 

Sarwa becik tinon asri. 


9.

Mijil


Tjitrosomo wolu gya pinilih, 

Dutaning Karaton, 

Pahargyan Melayu ing Tamasek, 

Sungging ukir lancar laras laris, 

Tikel antuk bathi, 

Jepara rahayu. 


10.

Gambuh


Jepara tambah maju, 

Kabeh warga manunggal bersatu, 

Ratu Sima Kalinyamat lan Kartini, 

Minangka pahlawan agung, 

Tepa palupi kesohor. 


11.

Pucung


Tanggap tangguh kasembadan kang ginayuh, 

Jepara ngrembaka, 

Panjang punjung pasir wukir, 

Gemah ripah loh jinawi tata harja. 


SYEKH SITI JENAR


Dhandhanggula


Tata cara puwasa kawuri, 

Apa dene paweweh sedhekah, 

Iku kawruhana kabeh, 

Murih kena ginugu, 

Pandam pandum pandoming budi, 

Nelahi  kyehning titah, 

Sinung swarga besuke, 

Wong Jawa kanut sarjana, 

Tur nyatane padha bae pengin uning, 

Siswa Syekh Siti Jenar. 


Kang mituhu sami mesu budi, 

Anglakoni tapa pating krembyah, 

Pancen nana ganjarane, 

Yen wus ngapal mantramu, 

Jatine kena pinanggih. 

Neng dunya bae padha, 

susah amemikul, 

Lara sangsaya tan beda, 

Marma Siti Jenar mung madhep Hyang Widhi

Gusti Dat roning kamal.


ARYA DAMAR PALEMBANG


Dhandhanggula 


Myang suratira Sri Narapati,

Majalengka kang dhawuh mring sira,

nulya tinampen sirage,

mring Harya Damar sampun, 

ponang surat binuka aglis,

sinuksma ing wardaya,

penget layang ingsun,

Brawijaya majalengka, 

Heh ta sira Harya Damar,

Sira sun paringi,

Garweng ngong putri Cina.


Nanging aja kokrewang saresmi,

lah hentenen ing titipaning wang,

yen wus mijil wawratane,

sakarsanira iku,

marang putri Cina wus dadi,

pan iku garwanira,

ywa ta hamaringsun,

sahesthining sriraning wang

pan wus kamot aneng patra kang sun tulis,

rampung tata titinya.



TAPA ING GUNUNG DANARAJA


Pangkur


Nimas Ratu Kalinyamat, 

Tilar wisma sumengka ngganing wukir, 

Tapa wuda sinjang rambut, 

Neng gunung Danaraja, 

Apratignya tan arsa tapihan ingsun, 

Yen tan antuk adiling Hyang, 

Patine sedulur mami. 


Kapindhone kakung ingwang, 

Hiya dene si Jipang kang mateni, 

Yen ora kelakon lampus, 

Si bethut Arya Jipang, 

Eningena gantiya ingkang winuwus, 

Pangeran Harya Penangsang, 

Pajineman kang den ulig.


Kelangkung kaprawiranira, 

Agal alus tan ana den wegahi, 

Cinatur jineman wau, 

Dhasar wong tau tatal,

Asring kinen akarya randhaning Ratu, 

Kekes Bupati bang wetan, 

Dene wong papat sinekti.


Pangeran Jipang ngendika, 

Mring wong papat kang sarya den kasihi, 

Kabeh sun jaluk gawemu, 

Padha lakuwa dhustha, 

Lan cidranen Sultan Pajang amrih lampus, 

Yen kelakon gawenira, 

Papat suk karya Bupati.


Si Setan Kober tamakna, 

Pamit nembah dhuwung dipun tampeni, 

Winanti wanti dhustha wus, 

Mesat sekawan pisan, 

Tan kawarna, lampahe sekawan rawuh, 

Kabeh kudu kawruhana, 

Amomor duk kala menjing.


Wus prapta sajroning pura, 

Kawarnaa lakune dhustha nenggih, 

Murih dalan ribet ribut, 

Malumpat pager bata, 

Panjingira aneng sajroning Kadhatun, 

Maling sekti papat pisan, 

Wus prapta pra sami ndingkik.



Purwadi, 

Ketua Lokantara

Komentar

Posting Komentar

Postingan populer dari blog ini

Babad GKR WANDANSARI

Gambar
 Babad  GKR WANDANSARI Reriptan: Purwadi 1. Dhandhanggula Gusti Kanjeng Ratu Wandansari,  Pangageng ing Sasana Wilapa,  Wiyosan siji Nopember,  Seket sanga kang tahun,  Panjang yuswa ambaling warsi,  Abdi dalem mahargya, Pamuji rahayu,  Lenggah agung binathara,  Wus lestari mbahu dhendha nyakrawati,  Karaton Surakarta.  Gusti Ratu Moertiyah marisi, Lekas luhur Kanjeng Sultan Pajang, Jaka Tingkir Mas Karebet,  Sumare aneng Butuh,  Nyata paring tepa palupi,  Trah Prabu Brawijaya,  Peputra Pembayun,  Dipati Handayaningrat,  Turun Pengging darah luhur tirta wening,  Ngejayeng tanah Jawa.  2. Pangkur Ambeg adil paramarta,  Myang ber budi bawa laksana yekti,  Tangguh tanggon paring dhawuh,  Amemayu bawana,  Gusti Ratu Wandansari amituhu,  Ing Lembaga Dewan Adat,  Wadhah suwita angabdi.  Pasrah Gusti Koes Moertiyah,  Seba sowan mring Ki Ageng Penjawi, Juru Mart...
Baca selengkapnya

Adipati Dayaningrat Pengging Sepuh

Gambar
Adipati Dayaningrat Pengging Sepuh Dr Purwadi, Ketua Lokantara,  HP 087864404347 A. Trah Pengging Kegiatan nyadran berlangsung pada hari Minggu Kliwon, tanggal 2 Pebruari 2025. Bertempat di makam Sri Makurung Handayaningrat di dusun Dukuh desa Malangan kecamatan Banyudono kabupaten Boyolali. Adipati Dayaningrat adalah Bupati Pengging yang terkenal sakti mandraguna.  Kejayaan Majapahit terus berlanjut. Semangat Prabu Brawijaya dalam membangun peradaban diwariskan oleh Ratu Pembayun. Putri sulung Prabu Brawijaya menikah dengan Adipati Sri Makurung Handayaningrat. Jasa Bupati Pengging ini diperingati oleh warga Pakasa, Paguyuban Karaton Surakarta Hadiningrat. Berlangsung pada hari Senin, 18 Juni 2023. Dipimpin oleh Dr KPH Wirabhumi SH, ketua Pakasa. Berkenan memberi sambutan pangageng Sasana Wilapa, Dra GKR Wandansari M.Pd. Turut menyertai GKR Ayu Koes Indriyah. Abdi dalem dan sentana ndherek wilujengan. Wit kepoh merupakan pohon tinggi. Berada di sebelah makam Sri Makurung Handa...
Baca selengkapnya

Kidung Idul Fitri

Gambar
 Kidung Idul Fitri Perangan 1 Kupat Idul Fitri 2025 1. Dhandhanggula Konjuk dhateng Panjenengan sami, Kula Purwadi lan Sari Indah,  Dalah anak sedayane,  Adityo kang rumuhun,  Aryo Bimo kang nomer kalih,  Anindito ketiga,  Pareng unjuk atur,  Bagya mulya hari raya,  Idul fitri nyuwun gunging pangaksami,  Lahir batin sumarah. Sami eling dinten Senin Paing,  Telu siji Maret gya lumampah,  Tahun rong ewu selawe,  Mahargya wanci agung,  Manggih riyaya idul fitri,  Winastanan lebaran,  Suwara gumuruh, Ngumandhang ing awang awang,  Tahlil takbir tahmid tasbeh dikir,  Pasa Ramadhan purna.  2. Megatruh Minal aidin wal faidin umatur,  Pangapura lahir batin,  Bapak ibu para sepuh, Kangmas mbakyu adhik adhik,  Jawat asta amiraos.  Pulang kampung lumaksana turut lurung, Saking kutha hilir mudik,  Desa sejatine hulu,  Pralampita wong ngaurip,  Saguh momong momor momot. 3. Miji...
Baca selengkapnya