Tahun Baru Suka Rahayu

 

 Tahun Baru Suka Rahayu

1.

Dhandhanggula

Gambireng tyas nut lampahing wanci, 

Mapak tumapaking warsa enggal, 

Tahun rong ewu selawe, 

Wondene wulanipun, 

Januari tanggale siji, 

Mangka dadya pertandha,

Maju tambah umur, 

Kawuri malih sejarah, 

Sinengkalan panca asta trusing swiwi, 

Jagad terang suminar. 

2.

Sinom

Kencar muncar gagrak anyar, 

Ingaranan teknologi, 

Saben dina tambah megah, 

Sing dipikir owah gingsir, 

Keh lumengser lumingsir, 

Kaget cingak gumun ngungun, 

Kapyarsa kulak warta, 

Warna warni informasi, 

Garap lokal prayoga ora ditinggal. 

3.

Durma

Greget gregah laku laju ngarah arah, 

Gagas petung taliti, 

Linambar wawasan, 

Widyatama kawignyan, 

Cipta landhep pikiran lantip, 

Undhaking warsa, 

Lumaksita basuki. 

4.

Megatruh

Tahun baru bareng maju kang tinuju, 

Jaman nguni wus kawuri, 

Nanging becik lamun weruh, 

Ywa nganti ilang kesingkir, 

Lakon kinarya pangilon. 

5.

Mijil

Gonta ganti lumampahing warsi, 

Sabarang lelakon, 

Padhang jingglang mujur jejer moncer, 

Tuna santak bathi sanak yekti, 

Gondhelan sesanti, 

Ajaran pitutur. 

6.

Asmarandana

Pahargyan tahun Masehi, 

Cathetan mawa petungan, 

Raga berag jiwa bares, 

Tumrap pakaryan negara, 

Apadene dagang layar, 

Sagah saguh tambuh wanuh, 

Srawung gancar sambung lancar. 

7.

Pangkur

Warsa enggal gya tumingal, 

Tatas rantas rancang garap pakarti, 

Permati lenging pandulu, 

Permana jangka jangkah, 

Wus kinebut tandang tanpa sambat sebut, 

Gegayuhan kasembadan, 

Teman gelis nemu manis. 

8.

Pucung

Mesem guyu yen mahargya tahun baru, 

Terompet ngumandhang, 

Nyumet mercon kembang api, 

Kabeh dalan sarana andum kabagyan. 

9.

Gambuh

Ketemu tahun baru, 

Tengah wengi padha mlaku mlaku, 

Dhampyak dhampyak sigrak jenak merak ati, 

Selompret muni gumuruh, 

Kembang api swara mercon. 

10.

Maskumambang

Keplok alok jejel riyel tengah margi, 

Kempal sakathahing jalma, 

Tuwa mudha gedhe cilik, 

Suwasana sung gembira. 

11.

Kinanthi

Sigra gumantine tahun, 

Rong ewu selawe iki, 

Pra mitra manggih nugraha, 

Bandha bandhu sugih luwih, 

Panjang yuswa bagas waras, 

Ayem tentrem lahir batin. 

Rabu Pon

1 Januari 2025,

Purwadi, 

Ketua Lokantara