Sunan Amangkurat Tegalwangi

 Sunan Amangkurat Tegalwangi




1.

Dhandhanggula


Asma Gusti Raden Mas Sayiddin, 

Raja putra negari Mataram, 

Bagus winasis mentereng, 

Atmaja Sultan Agung, 

Ratu Batang sang prameswari, 

Tedhaking Hupasanta, 

Bupati misuwur, 

Juru Martani Ki Saba, 

Brawijaya Bondhan Kejawan siwi, 

Sela Nis Pemanahan. 


Urutane turun Majapahit, 

Wilwatikta adipati Tuban, 

Rasawulan Magribi Seh, 

Peputra Jaka Tarub, 

Nawangwulan putri Nawangsih, 

Lembu Peteng akrama, 

Asesunu sampun, 

Ki Ageng Getas Pendhawa, 

Wanasaba Sela Kasihan sumiwi, 

Leluhur kraton Jawa. 


Kyai Ageng Sela peputra Nis, 

Turun Kyai Ageng Pemanahan, 

Alas Mentaok pernahe,

Penjawi sabiyantu, 

Handayani Juru Martani, 

Tetruka Ngeksiganda, 

Pulung wahyu ndaru, 

Giring kanugrahan degan, 

Gagak emprit Senapati wus inganggit, 

Danang Sutawijaya. 


Nata mbahu dhendha nyakrawati, 

Raja ber budi bawa laksana, 

Lenggah ing kedhaton Plered, 

Sri Amangkurat Agung, 

Wus sumare ing Tegalwangi, 

Sembada wirotama, 

Sugih bandha bandhu, 

Ambeg adil paramarta, 

Seger bener kober bleger pinter becik, 

Paring tepa tuladha. 


Sunan Amangkurat Tegalwangi, 

Narendra gung Karaton Mataram, 

Lir ganda mlathi  rinonce, 

Angambar wangi arum, 

Wulang wuruk ing Tanah Jawi, 

Lumantar Wali Sanga, 

Gancar mbabar kawruh, 

Wiwit Kraton Demak Pajang, 

Mandhegani murih basuki lestari, 

Karya wosing Wejangan. 


Prameswari nata kaping siji, 

Kanjeng Ratu Mas ing Surabaya, 

Guyub rukun gandheng renteng, 

Pangeran Pekik sunu, 

Wandansari putri Mentawis, 

Wasis manis kawentar, 

Rayi Sultan Agung, 

Apeputra Raden Rahmat, 

Amangkurat Amral anglintir tumuli, 

Kartasura Diningrat. 


2.

Kinanthi


Amangkurat Tegalarum, 

Garwa Ratu Wiratsari, 

Putra Pangeran Kajoran, 

Tedhak turun Jaka Tingkir, 

Benawa karaton Pajang, 

Kasusra diddaya sekti. 


Joko Kahiman satuhu, 

Titis wasis samukawis, 

Atmaja Sunan Prawata, 

Kinen jumeneng Bupati, 

Pangarsa tlatah Banyumas, 

Dhawuh raja Jaka Tingkir. 


Kusuma rembesing madu, 

Amangkurat Tegalwangi, 

Anggarwa Ratu Kencana, 

Raden Drajat Banyumanik, 

Sinuwun Paku Buwana, 

Atmaja narpa Mentawis. 


Suwita Pangeran Lambung, 

Miyos saking Banjarmasin, 

Ndherek Sunan Amangkurat, 

Milangkori tanah Jawi, 

Gya nami Lambung Mangkurat, 

Lestari dadya priyayi. 


3.

Mijil


Narendra kagungan emas picis, 

Tlatah sisih kulon, 

Amemangun kedhaton Pamase, 

Ajibarang Banyumas  memetri, 

Dayane hartati, 

Jeng Ratu Serayu. 


Bupati sigra sengkut makarti, 

Manunggal gumolong, 

Cipta rasa karsa karya gedhe, 

Linambaran pakarti pekerti, 

Banyumas sejati, 

Lila guyub rukun. 


Ngalami jaman kencana rukmi, 

Amangkurat katong, 

Sentana punggawa jero beteng, 

Nara praja kawula negari, 

Gembleng tunggal kapti, 

Amrih sami makmur. 


4.

Gambuh


Boga wastra sadarum, 

Sunan Amangkurat Tegalarum, 

Waras wasis wisma laras laris manis, 

Mataram tambah misuwur, 

Katon maton tanggap tanggon. 


Bangunan saka kayu, 

Ing pangajab pikantuk rahayu, 

Amangkurat Kanjeng Ratu Wiratsari, 

Banyumas tambah ngrembuyung, 

Suka gembira rinaos. 


Gambireng tyas rahayu, 

Tukang mlaku  dagang layar payu, 

Juru tani taliti gemi nastiti, 

Amangkurat paring dhawuh, 

Darapon tumanja awoh. 


5.

Pangkur


Pabrik trasi Lasem Rembang, 

Pirang pirang kondhang belah pesisir, 

Wegig pelabuhan laut, 

Amangkurat mranata, 

Kanjeng Ratu kersa udhu bahu suku, 

Pasaran manca negara, 

Dugi Samudra Pasai. 


Sampun kocap pabrik kecap, 

Madeg jejeg mapan neng Purwodadi, 

Kedhele Ngawi Madiun, 

Tuban Lamongan Blora, 

Ponorogo Blitar Nganjuk Tulungagung, 

Trenggalek Sragen Pacitan, 

Bojonegoro Kediri. 


Para Bupati Banyumas, 

Golong gilig arsa mbangun negari, 

Dhawuh Amangkurat Agung, 

Nuhoni Ratu Kencana, 

Mrih rahayu iline kali Serayu, 

Angocori sawah sawah, 

Tela pohung jagung pari. 


Pelabuhan Tanjung Perak, 

Amangkurat anggagas Surabangi, 

Ternate Bugis Maluku, 

Tidore Bali Banjar, 

Deli Serdang Palembang Bangka Belitung, 

Cirebon Banten Sumedang, 

Lampung Siak Indragiri. 


6.

Asmarandana


Kanjeng Ratu Wiratsari, 

Prameswari Amangkurat, 

Yasa Kedhaton Pamase, 

Ambangun tlatah Banyumas, 

ing Lesmana Ajibarang, 

Mahargya Ratu Serayu, 

Kadang tani among dagang. 


Dumugi Rembang pesisir, 

Pelabuhan dagang layar, 

Selat Malaka Tamasek, 

Banjar Aceh Deli Serdang, 

Ternate Bugis Makassar, 

Tidore Ambon Maluku, 

Cirebon Banten Pasundan. 


7.

Pucung


Tlatah timur tani dagang tambah makmur, 

Probolinggo Malang, 

Pasuruan Jombang Gresik, 

Amangkurat narendra gung mider ing rat. 


Alun alun papan amba kebak purun, 

Aneng Purwakerta, 

Among dagang laris manis, 

Amangkurat paring cahya kang sumirat. 


Tani maju perenging gunung Semeru, 

Malang Pasuruan, 

Probolinggo Banyuwangi, 

Situbondo lumajang Jember weh terang. 


Gunung Lawu sanana mesu lelaku, 

ing Kali Ketangga, 

Amangkurat tapa ngeli, 

Sri narendra tarak brata lara lapa. 


8.

Megatruh


Sarwa luhur Banyumas wilayah subur, 

Kabawah kraton Mentawis, 

Raja Amangkurat Agung, 

Sarta Ratu Wiratsari, 

Pura Pamase mencorong. 


Apel Batu seger buger padha tuku, 

Bener cocok enak gurih, 

Angrembuyung pereng gunung, 

Suka lila kadang tani, 

Tandur subur aweh awoh. 


9.

Pucung


Desa gunung seni tumangkar ngrembuyung, 

Wilayah Banyumas, 

Kanjeng Ratu Wiratsari, 

Amangkurat nata agung hayuningrat. 


Laris payu pakaryan pereng Serayu, 

Warga pegunungan, 

Gumelem tansah makarti, 

Setya darma labuh labet marang praja. 


10.

Kinanthi


Lumaku toya Serayu, 

Kinclong kinclong sarwa bening, 

Kanjeng Sunan Amangkurat, 

Sesarengan prameswari, 

Nyawang gunung Slamet endah, 

Banyumas kang edi peni. 


Pasir wukir panjang punjung, 

Kawula praja Mentawis, 

Amangkurat kalokengrat, 

Kanjeng Ratu Wiratsari, 

Ngudi dagang pelayaran, 

Lumampah pambelah gisik. 


11.

Pangkur


Dhatulaya Ajibarang, 

Papan sumber emas kencana rukmi, 

Nata Amangkurat Agung, 

Wiratsari kang garwa, 

Paring dhawuh mrih Banyumas wutuh tangguh, 

Kuwat drajat pangkat semat, 

Sugih bandha bandhu budi. 


Bregada jurit samudra, 

Pilih tanding madyaning jalanidhi, 

Mundhut piranti perahu, 

Nadyan reregan larang, 

Reksa laut suradhadhu baut patut, 

Silem gladhening layaran, 

Prigel trampil olah warih. 


12.

Pucung


Ing Serayu kali ayu lan rahayu, 

Sunan Amangkurat, 

Tapa kungkum tapa ngeli, 

Mesu jiwa anoraga cipta rasa. 


Numpak prahu tengah laut sigra laju, 

Aneng pelabuhan, 

Rumeksa wadya prajurit, 

Tata bala olah gelaring samudra. 


13.

Sinom


Garwa dalem Amangkurat, 

Kanjeng Ratu Wiratsari, 

Katelah Ratu Kencana, 

Tedhak turun Jaka Tingkir, 

Nyata putri linuwih, 

Sinebut Ratu Serayu, 

Mbangun nagri Mataram, 

Gemah ripah loh jinawi, 

Wiwit brang wetan nganti tlatah Banyumas. 


Tata praja ing negara, 

Ngasta permana permati, 

Kanjeng Sunan Amangkurat, 

Ngereh sagung adipati, 

Wetan kulon pesisir, 

Laladan samudra kidul, 

Winengku tata cara, 

ingukir lendheping pikir, 

Pra kawula cukup sandhang wisma boga. 


14.

Maskumambang


Bungah susah yekti gawane ngaurip, 

Kawula tlatah Banyumas, 

Mersudi luhuring budi, 

Suwita Kraton Mataram. 


Abdi dalem sampun tampi dana dhuwit, 

Bungah turah arta daya,

Marem ayem jroning kapti, 

Narendra nyata sembada. 


15.

Durma


Tuking rukmi aneng desa Pancurendhang, 

Rajabrana mas picis, 

Sumber penghasilan, 

Tumrap praja Mataram, 

Mbudidaya Sri Wiratsari, 

Sri Amangkurat, 

Mersudi pala karti.


Gunung Kendheng gunung Renteng gunung Pandhan, 

Sumbering minyak bumi, 

Mubal lenga patra, 

Temayang Jepun Tuban, 

Lumaku budidaya nuli, 

Cerak bengawan, 

Tilel sakehing bathi. 


16.

Gambuh


Papan kidul pununjul, 

Gunung Slamet agung kaya payung, 

Ambawahi wilayah Banyumas kang peni, 

Amangkurat terus ambangun, 

Sigrak gumyak gotong royong. 


Tambah makmur sempulur 

Minyak tanah mapan ing sumur bur, 

Kanan kiri tanem tuwuh kayu jati, 

Perkutut ocehing patut, 

Prabeya praja gumrojog. 


17.

Pangkur


Jeng Pangran Kajor kocap, 

Sentana kang sugih inten mas picis, 

Bandha bandhu tanah mbrewu, 

Tedhak Pangeran Benawa, 

Wus misuwur trah Pajang kang makmur, 

Wiratsari ingkang putra, 

Ginarwa Sri Tegalwangi. 


Kutha praja Kartasura, 

Amangkurat Amral titi patitis, 

Tumpuk undhung mas jumerut, 

Mangka bandha negara, 

Sami udhu lumintu sajuru juru, 

Juru tani among dagang, 

Untung bathi mbanyu mili. 



18.

Dhandhanggula


Guru bangsa mbabar wiyatadi, 

Kawentar Pangeran Karanggayam, 

Saking wilayah Kebumen, 

Pituduh barang kawruh, 

Paugeran tata negari, 

Peprentahan bebrayan, 

Pandoming pandulu, 

Jeng Sultan Hadiwijaya, 

Paring dhawuh murih rahayu lestari,  

Pujangga Kraton Pajang. 


Ludruk kentrung kethoprak wigati, 

Wayang gamelan terus ngembaka, 

Joged tembang mekar gedhe, 

Jathilan reyog tayub, 

Jaran kepang sigrak ngangeni, 

Kawula gambireng tyas, 

Ayem guyub rukun, 

Tontonan tuntun tatanan, 

Guna seni aweh seneng saben jalmi, 

Warata saknegara.


19.

Pangkur


Kaloka Sri Ratu Batang, 

Ing Mataram minangka prameswari, 

Garwanipun Sultan Agung, 

Miyos Sri Amangkurat, 

Sampun purun tlatah Banyumas binangun, 

Narendra gung binathara, 

Mbahu dhendha nyakrawati. 


Manggih jaman keemasan, 

Kanjeng Sunan Amangkurat mersudi, 

Sinartan Ratu Serayu, 

Mranata pra kawula, 

Gancar lancar urip urup subur makmur, 

Cekap cukup cukap cakap, 

Enjang sonten siyang ratri. 


20.

Kinanthi


Kanjeng Ratu Mas Serayu, 

Pinilih putri linuwih, 

Atmaja Joko Kahiman, 

Hupasanta  malakrami, 

Miyos Kanjeng Ratu Batang, 

Sultan Agung ing Mentawis. 


Nata Kanjeng Sultan Agung, 

Amangkurat Tegalwangi, 

Amangkurat Amral, 

Paku Buwana siji, 

Sunan Amangkurat Emas, 

Sinuwun Mangkurat Jawi. 


21.

Dhandhanggula


Pantes luwes kinarya palupi, 

Labuh labet raja Amangkurat, 

Yasa Kedhaton Pamase, 

Sayekti tangguh ampuh, 

Mbangun jaman kencana rukmi, 

Lesmana Ajibarang, 

Pancurendhang mancur, 

Emas picis rajabrana, 

Bandha bandhu budi linangkung utami, 

Kanjeng Ratu Kencana.


Kanjeng Panembahan Senapati, 

Paring tuladha kagem wong Jawa, 

Aneng dhatulaya bale, 

Ganti Sinuwun Prabu , 

Nyakrawati wus menggalih, 

Murih bagya minulya , 

Kagem anak putu, 

Lumaksana gya makarya, 

Gemi tliti ngati ati barang kardi, 

Amangkurat Mataram. 


22.

Maskumambang


Wus ngakoni titah salumahing bumi, 

Kawula praja Mataram, 

Pinanggih wibawa mukti, 

Widada suka gembira. 


Panjang punjung gemah ripah loh jinawi, 

Ayem tentrem karta harja, 

Amangkurat Tegalwangi, 

Negara arum kuncara. 


Purwadi, 

Universitas Negeri Yogyakarta

Komentar

Posting Komentar

Postingan populer dari blog ini

Asal Usul Leluhur Prabowo Subianto

Gambar
  Asal Usul Leluhur Prabowo Subianto Purwadi,  Ketua Lokantara.  HP 087864404347 I. Keturunan Majapahit.  Prabu Brawijaya raja Majapahit memang pemimpin yang bijak bestari. Membawa kemakmuran, kejayaan dan keemasan bagi sekalian negeri. Rakyat sejahtera lahir batin. Murah sandang pangan papan.  Leluhur Prabowo Subianto ini memang narendra gung binathara mbahu dhendha nyakrawati, ber budi bawa laksana, ambeg adil paramarta, memayu hayuning bawana.  Wajar sekali jiwa kepemimpinan Prabowo ibarat satriya piningit. Pemimpin yang ditunggu tunggu rakyat. Munculnya satriya piningit terjawab saat Prabowo Subianto terpilih menjadi Presiden. Pemilihan umum tanggal 14 Pebruari 2024 berjalan lancar. Rakyat memberi dukungan berlimpah ruah.  Majapahit kerajaan yang agung dan anggun. Tampil sebagai pemimpin notonagoro. Artinya Prabowo Subianto menjalankan dhawuh leluhur. Agar mau mengabdi kepada bangsa dan negara. Lila lan legawa kanggo mulyaning negara.  Notonag...
Baca selengkapnya

SUGENG RIYADI IDUL FITRI.

Gambar
  SUGENG RIYADI IDUL FITRI.  Purwadi, Sari Indah Setiani, Adityo Jatmiko, Aryo Bimo Setiyanto, Anindito Wisnu Prasetyo.  1. Dhandhanggula Idul Fitri.  Sugeng hari raya Idul Fitri,  Wonten ngarsanipun Panjenengan,  Konjuk sesepuh pepundhen,  Kangmas adhik lan mbakyu,  Purwadi Sari nyuwun idi,  Adityo Bimo pasrah,  Anindito matur,  Ulat patrap lan pangucap,  Kirang utami luberna welas asih,  Dhateng kula sakbrayat.  Pareng nyuwun gunging pangaksami,  Awit saking kehing kalepatan,  Ingkang alit saha gedhe,  Jroning sambung lan srawung,  Muna muni kirang prayogi,  Anungkak tata krama,  Tilar unggah ungguh,  Sopan santun suba sita,  Pasrah dhiri mumpung hari Idul Fitri,  Kula trimah nglenggana.  Idul Fitri purna wulan suci,  Takbir tahlil tahmid gya ngumandhang,  Wiwit surupe srengenge, Siyang dalu amunjuk,  Suka sukur marang ilahi,  Sholat Id wanci enja...
Baca selengkapnya

Babad Pangeran Benawa

Gambar
 Babad Pangeran Benawa Purwadi,  Ketua Lock Antara HP 087864404347 1. Dhandhanggula Raja putra Pajang kang winarni,  Asmanipun Pangeran Benawa,  Wusnya minulya sumare,  Ing Morotoko dhukuh,  Kapernah desa Wateshaji,  Minangka pajimatan,  Agung inggil luhur,  Suka lila angrumeksa Warga Pati kecamatan Pucakwangi,  Ginanjar antuk berkah. Narendra gung Raden Jaka Tingkir,  Jejuluk Sultan Hadiwijaya,  Kang kawentar Mas Karebet,  Wasis waskitha ampuh,  Tedhak turun priyagung Pengging,  Atma Kebo Kenanga,  Tur rembesing madu,  Dhasare trahing kusuma,  Ratu Pembayun Dayaningrat Dipati,  Turase Brawijaya. Kanjeng Ratu Cepaka linuwih,  Ingkang ibu Pangeran Benawa,  Pindha melathi rinonce,  Ganda sumerbak arum,  Sekar dhaton kinasih aji,  Kanjeng Sultan Trenggana,  Bagas bagus alus,  Ber budi bawa laksana,  Ambeg adil mbahu dhendha anyakrawati,  Nata Demak Bin...
Baca selengkapnya