Mangayu Bagya PAKASA

SESANTI PAKASA

Saraya Setya Rumeksa

Purwadi

Ketua Lokantara

HP 087864404347

BAB I

PAKASA PUNJER

Dhandhanggula

Tumapaking wanci ambal warsi,

Sagung warga minulya Pakasa,

Ing sanga likur Nopember,

Yuswane sanga telu,

Paguyuban kawula abdi,

Karaton Surakarta,

Madhep mantep purun,

Saraya setya rumeksa,

Asesanti murih basuki lestari,

Sangune pasuwitan.

Kinanthi

Pangarsa punjer nenuntun,

Pakasa lumampah becik,

Tuwuh mundhak mencar ambyak,

Dugi Pakasa pang ugi,

Cancut gumregut gumregah,

Sarwa sarwi amakarti.

Mijil

Siyang ratri kiprah warni warni,

Pakasa mencorong,

Sukoharjo Karanganyar Sragen,

Surakarta Klaten Wonogiri,

Boyolali ngesti,

Edi peni adi luhung.

Gambuh

Wilayah Jawa Timur,

Blitar Malang Sidoarjo Nganjuk,

Ponorogo Kediri Pacitan Ngawi,

Trenggalek Tuban Madiun,

Pakasa tambah kesohor.

Pucung

Pantes muwus Purwodadi Blora Kudus,

Semarang Jepara,

Kebumen Magelang Pati,

Demak kocap Banjarnegara Cilacap.

Pangkur

Abdi dalem Surakarta,

Sumebar ing tlatah bumi pertiwi,

Budaya kuncara arum,

Ngejayeng jagad raya,

Dadi payung Pakasa sinengkuyung,

Ber budi bawa laksana,

Mbahu dhendha nyakrawati.

Asmarandana

Jeng Pangeran Wirabhumi,

Pangageng Punjer Pakasa,

Anetepi gawa gawe,

Amrih mandiri tumata,

Nglampahi sedaya program,

Lumampah angarah arah,

Jumbuh kang sami ginayuh,

Sembada ingkang sinedya.

Sinom

Jalu estri anom tuwa,

Kang tut wuri handayani,

Pakasa asung tuladha,

Madyaning bebrayan Jawi,

Mangun karsaning kapti,

Asumber ing wulang wuruk,

Reriptan pra pujangga,

Serat Wulangreh Centhini,

Wulang Putra Cebolek Wiwaha Jarwa.

Durma

Kraton Dalem Surakarta Hadiningrat,

Kanthi weninging galih,

Cipta rasa karsa,

Jiwa raga manunggal,

Lembaga Dewan Adat mimpin,

Sana Wilapa,

Pakasa mangastuti.

Jeng Ratu Wandansari.

10.

Megatruh

Kawruh baku ingukir sigra lumaku,

Sastra gendhing Nitisruti,

Dewaruci Sanasunu,

Panji Menak Candrarini,

Pakasa ndherek Karaton.

11.

Maskumambang

Suka gembira warga Pakasa sami,

Pahargyan ing tanggap warsa,

Upacara mesu budi,

Tata cara wilujengan.

BAB II

PAKASA PANG NGANJUK

Gambuh Nganjuk Sarujuk.

Warga Nganjuk sarujuk,

Tandang gawe amrih sarwa mathuk,

Guyub rukun tekade padha nyawiji,

Jumangkah tunggal panemu,

Tuwa anom gotong royong.

Tlatah Nganjuk misuwur,

Mbudi daya urip subur makmur,

Nandur brambang kacang dhele jagung pari,

Sandhang pangan papan cukup,

Kanthi patrap andhap asor.

Desa kutha ing Nganjuk,

Sawah tegal saben dina pethuk,

Gunung renteng gunung pandhan gunung Wilis,

Kali brantas brumbung badhug,

Wus kondang wisata praon.

Sarapan aneng Nganjuk.

Sega pecel lawuh peyek krupuk.

Jajan pasar jongkong cucur dumbleg cenil.

Ondhe ondhe tempe tahu.

Jangan asem jangan bobor.

Budaya adi luhung,

Karawitan pedahalangan agung,

Tayub kledhek jaran kepang edi peni,

Seni tumangkar ing Nganjuk,

Maweh ayem lahir batos.

Nganjuk Mranani.

Kutha cilik sangisore gunung Wilis,

Iku pantes dadi pacangkramaning pra turis,

Yo kanca ing Sedhudha,

Ing perenging arga,

Lelumban lan byur byuran,

Weh bagasing raga,

Rampung njajan nginep ing pesanggrahan,

Wis mesthi kepranan nyawang kaendahan,

Ja lali ja keri kutha Nganjuk mranani.

Kali Bening sakperenge gunung Pandhan,

Iku dadi proyek kacukupan sandhang pangan,

Ngocori sabin sabin saeloring kutha,

Mesthi agawe pengin,

Wong sing padha teka,

Sumur kompor ing ngendi endi ana,

Tandur tandur subur bisa gawe makmur,

Ja lali ja keri kutha Nganjuk ngenteni.

Kabudayan kesenian pancen nyata,

Iku dadi pikukuh kaprobadening bangsa,

Kerawitan pedhalangan beksa olahraga,

Candi Ngetos wis nyata peninggalan kuna,

Pembangunan kuncara liyan praja,

Rerenggane kutha wis sarwa tumata,

Ja lali ja keri kutha Nganjuk nggon seni.

BAB III

PAKASA PANG PATI

Dhandhanggula

Raja putra Pajang kang winarni,

Asmanipun Pangeran Benawa,

Wusnya minulya sumare,

Ing Morotoko dhukuh,

Kapernah desa Wateshaji,

Minangka pajimatan,

Agung inggil luhur,

Suka lila angrumeksa

Warga Pati kecamatan Pucakwangi,

Ginanjar antuk berkah.

Narendra gung Raden Jaka Tingkir,

Jejuluk Sultan Hadiwijaya,

Kang kawentar Mas Karebet,

Wasis waskitha ampuh,

Tedhak turun priyagung Pengging,

Atma Kebo Kenanga,

Tur rembesing madu,

Dhasare trahing kusuma,

Ratu Pembayun Dayaningrat Dipati,

Turase Brawijaya.

Kanjeng Ratu Cepaka linuwih,

Ingkang ibu Pangeran Benawa,

Pindha melathi rinonce,

Ganda sumerbak arum,

Sekar dhaton kinasih aji,

Kanjeng Sultan Trenggana,

Bagas bagus alus,

Ber budi bawa laksana,

Ambeg adil mbahu dhendha anyakrawati,

Nata Demak Bintara.

Ratu Kalinyamat luwih sugih,

Pangeran Hadirin wus anggarwa,

Asale Samudra Pase,

Ber bandha lan ber bandu,

Rajabrana inten mas picis,

Rena tata wiyata,

Kawruh wulang wuruk,

Benawa ndherek suwita,

Gelis wasis tatas titis samukawis,

Meguru aneng Jepara.

Sami ndherek Pangeran Hadirin,

Kanjeng Madiun Rangga Jumena,

Dipati Pangeran Onje,

Benjang nuli kajunjung,

Purbalingga mangka bupati,

Raden Joko Kahiman,

Derajat ngaluhur,

Adipati Banyumas,

Wus permati nggulawenthah siswa siwi,

Jeng Ratu Kalinyamat.

Pangkur

Pangeran Benawa putra,

Paring asma Ratu Dyah Banuwati,

Wanita hayu rahayu,

Dhauping palakrama,

Prabu Hadi Nyakrawati gya miyos sunu,

Sultan Agung Nyakrasuma,

Narendra Kraton Mentawis.

Wondene Rangga Jumena,

Retna Dumilah garwa Senapati,

Tedhak turune Madiun,

Jeng Ratu Mas Balitar,

Prameswari Paku Buwana kang sepuh,

Tangguh tangggon tansah tanggap,

Ambawani tanah Jawi.

Benawa asung tuladha,

Nurunake darah santri priyayi,

Nggegulang sabarang ilmu,

Pesantren gya ngrembaka,

Pamulangan dadi piranti pituduh,

Gumebyar gilar sumebar,

Kinarya sangu makarti.

Gambuh

Sowan marang leluhur,

Kraton Surakarta kang misuwur,

Putra Pajang sumare laladan Pati,

Benawa paring pitutur,

Mawi wejangan miraos.

Pangeran Benawa perlu,

Medharake sanggya ilmu laku,

Kawruh sepuh wutuh kasampurnan jati,

Drajat pangkat semat wahyu,

Rumasuk padhang sumorot.

Kinanthi

Benawa patut tiniru,

Bekti marang Senapati,

Pasrah panguwasa Pajang,

Kawibawan kraton Pengging,

Lumintir aneng Mataram,

Supaya lumaku becik.

Nak tumanak run tumurun,

Pangeran Benawa iki,

Pinaringan kanugrahan,

Kawiryan hartawan wasis,

Demak Pajang lan Mataram,

Widada sugeng lestari.

BAB IV

PAKASA PANG MAGELANG

Dhandhanggula

Angandika alon sri bupati.

dhateng kang abdi kapedhak lama.

Ki Pranataka namane.

Heh gendhewor sireku.

Lumakua sira den aglis.

Sun utus marang Donan.

Ing masigid watu.

Iya ing Nungsa Berambang.

Angambila sekar wijayadi luwih.

Iya Jayakusuma.

Aja mulih yen ta durung olih.

Nadyan silih jambul wanen sira.

Sun upatani yen muleh.

Yen ana kang pitulung.

Dene teka gampang ing benjing.

Kembang wijayamulya.

Mring sira kapangguh.

Wotsekar Ki Pranataka.

Tur sandika ing karya datan gumingsir.

Nadyan dhumateng pejah.

Sampun lengser saking ing ngarsa ji.

Pranataka sedya marang Donan.

Anglugas raga lampahe.

Warnanen sang aprabu.

Nulya nembang tengara aglis.

Budhal saking Toyamas.

Kang wadya gumuruh.

Dhateng nagari ing Tegal.

Angentosi utusan kang mring Betawi.

Ki Arya Mandaraka.

Kawarnaa kang anglugas ragi.

Kang dinuta mring Nungsa Berambang

Ki Pranataka lampahe.

Prapta masigid watu.

Tan anyipta kalamun urip.

Amung anyipta pejah.

Raosing tyasipun.

Tan adhahar tan anendra.

Pitung dina anenedha ing Hyang Widhi.

Mugi antuka karya.

Apan sampun karsaning Hyang Widhi.

Amarengi ing dinten Jumungah.

Tengah wengi ing wayahe.

Ana katingal mancur.

Cahyanira ngebeki bumi.

Ing wite jayamulya.

Wau enggenipun.

Kang sekar jayakusuma.

Mung sarakit nulya pinethik tumuli.

Maring Ki Pranataka.

Langkung bungah.

dennya antuk kardi

Pranataka sigra lampahira

Maring Toyamas jujuge.

Prapta Toyamas suwung.

Lampahira laju mring Tegil.

Ing enu tan winarna.

Ing Tegal wus rawuh.

Lajeng tumameng ngayunan.

Sampun katur sekar wijayadi luwih.

Marang sri naranata.

Pangkur

Dangu denira sineba.

Arsa junjung marang kang abdi-abdi.

Wong kadipaten sadarum.

Sami sinungan nama.

Mondaraka kang wau sampun jinunjung.

Adipati Mandaraka.

Apan kinarya pepatih.

Dene wau Pranantaka.

Wus jinunjung Sindurja ingkang nami.

Andangkara wastanipun.

Nenggih Ki Wiradigda.

Kyai Sendhi Ki Urawan wastanipun.

Ni Dhakarta wastanira.

Tumenggung Binarong nenggih.

Ingaran wong jagasura.

Angandika wau sri narapati.

Maring Arya Sindurjeku.

Heh sira ingsun duta.

Lumakua sira mring desa ing Kedhu.

Parimana ing Mataram.

Sapa ingkang angenggeni.

Sinom

Raden Arya Sindureja.

budhal saking nagri Tegil.

lawan Raden Maduretna.

gumuruh swaraning jalmi.

saupacara asri.

wong Sarageni neng ngayun.

bandera warna-warna.

wong anumbak aneng wuri.

busanane lir pendah sekar sataman.

Tan winarna solahira.

Wus lepas lampahing baris.

Ing Kaliwungu wus prapta.

Rereb sakala kang baris.

Saksana budhal enjing.

Wus ngancik telatah Kedhu.

Ki Arya Sindureja.

Ing Kathithang den anciki.

Kathah prapta sentanane Parimana.

Dhandhanggula

Si Gendhewor wastane duk alit.

Kala taksihe amanakawan.

Kala samana kinengken.

Dhateng gustine wau.

Iya kangjeng pangran dipati.

Ngandikane pangeran.

Marang kang ingutus.

Kang aran Ki Pranantaka.

Si Gendhewor sira ta lungaa aglis.

Sira menyanga donan.

Sira ngularana sekar adi.

Iya sekar Wijaya Kusuma.

Lah iku sira den oleh.

Sigra saha wotsantun.

Pranantaka saking ing ngarsi.

Sampun mangkat sadaya.

Wau kang ingutus.

Awatara pitung dina.

Kang ingutus mring Tegal bubar tumuli.

Mangkat dhateng Tetegal.

Kala jumeneng sri narapati.

Ing Rebo Epon dinane ika.

Nuju tanggal patlikure.

Ing Sura sasinipun

Taun Wawu den sangkalani.

Janma aneng gegana.

Sinayang ing ratu.

Samana Ki Pranantaka.

Kang ingutus mring Donan amundhut sari.

Praptane antuk karya.

Kang ingupaya angsal sarakit.

Aran sekar Wijayakusuma.

Samana wus ngaturake.

Dhumateng sang aprabu.

Langkung suka galih narpati.

Rumaos yen sih ing Hyang.

Nugraheng Hyang Luhur.

Dhawuh rumasuking nata.

Panjenengan tanah Jawa wus kapusthi.

Kagem aneng ing asta.

Ki Pranantaka kalangkung dening.

Kapracaya ing salampahira.

Kinulawisudha mangke.

Apan jinunjung lungguh.

Pranantaka sinung kekasih.

Jinunjung saking ngandhap.

Sumengkeng aluhur.

Aran Arya Sindureja.

Kyai Sendhi apan sinungan kekasih.

Aran Demang Urawan.

Asmaradana

Wus tetep jumeneng aji

Sang nata sigra parentah

Padha estrenana kabeh

Samengko Si Mandaraka

Ngong karya patih ingwang

Sun junjung lungguh tumenggung

Ki Tumenggung Mondaraka.

Kang den utus sri bupati

Dhumateng Nungsa Kambangan

Mundhut kang sekar wastane

Jayakusuma wus prapta

Sarakit kang puspita

Lajeng kunjuk sang aprabu

Langkung suka sri narendra.

Ngraos tuk nugraha jati

Sihing Suksmana jenengnya

Tanah Jawa sedayane

Wus kagem aneng ing asta

Suraosing wardaya

Kyai Pranataka wau

Dhateng kanjeng sri narendra.

Langkung kapracayeng westhi

Sang nata asru ngandika

Si Pranataka samengko

Ingsun junjung linggihira

Lan sun paringi nama

Iku arane Tumenggung

Sindureja aranira.

BAB V

PAKASA PANG JEPARA

Pakasa Pang Jepara

Pangkur

Nenggih Pakasa Jepara,

Sigrak gumyak lumaris pacak baris,

Jeng Susanti Purwaningrum,

Jeng Bambang Setiawan,

Gya lumaku kanthi udhu bahu suku,

Sukodono ing Tahunan,

Tuwuh aris awoh manis.

Mijil

Nguri uri seni edi peni,

Dinten Setu Kliwon,

Joglo Hadipuran pangesuhe,

Karawitan pedhalangan gendhing,

Sastra tembang tari,

Katon adi luhung.

Dhandhanggula

Gusti Kanjeng Ratu Wandansari,

Sinartan Ratu Retno Dumilah,

Ngestreni pahargyan gedhe,

Tetepan pra pengurus,

Pakasa Pang Jepara aglis,

Tetembangan ngumandhang,

Bondowoso Bandung,

Iringan kang kawentar,

Gelar ringgit lakon mligi kebak sanggit,

Mimbuh suka gembira.

Sinom

Momong Pakasa Jepara,

Gladhen tlaten mudha mudhi,

Momot sakehing gagasan,

Manca warna ing penggalih,

Pikoleh alih lilih,

Urup mletiking panemu,

Nyengkuyung Kanjeng Bambang,

Selaras lan Jeng Susanti,

Ing Jepara budaya arum kuncara.

Manggih hayu rahayu,

Juru ukir kondhang tukang kayu,

Endah edi tata titi merak ati,

Ngayun ayun wus kayungyun,

Kayat kerep karep kayon.

Asmarandana

Gagas pikir juru ukir,

Ingaranan kaendahan,

Sekar sumekar rinonce,

Sumebar ing jagad raya,

Jimat Sungging Purbengkara,

Kraton Majapahit ngutus,

Jepara dadya kaloka.

Pucung

Mesem guyu dagang layar sarwa payu,

Wiwit jaman Demak,

Kanjeng Pangeran Hadirin,

Kalinyamat Ratu paring semat drajat.

Kinanthi

Mbudidaya murih unggul,

Joglo Hadipuran ngudi,

Prajurit Nguntara Praja,

Pawiwahan angrenggani,

Loka Budaya latihan,

Olah kridha gelar seni.

BAB VI

PAKASA PANG SRAGEN

Dhandhanggula Sukawati.

Kang kababar babad Sukawati,

Rikala Sultan Hadiwijaya,

Misuda bupati Sragen,

Miwah Ki Ageng Butuh,

Ki Penjawi kersa nyekseni,

Pangarsa ing Brang Wetan,

Sedaya nyengkuyung,

Kawula sami mahargya,

Tata cara jumenengan adipati,

Kanjeng Tejanagara.

Toya mili saking bumi Pengging,

Anjog rumembes kali bengawan,

Gancar mili enjang sore,

Sawah tegalan subur,

Rakyat makmur ing Sukawati,

Mataram Surakarta,

Berkahe leluhur,

Ing kutha karang padesan,

Rakyat Sragen tekun tekan amakarti,

Sembada kang jinangka.

Gambuh Sukawati

Sukawati misuwur,

Pinandegan pangarsa kang luhur,

Trampil gampil titis wasis samukawis,

Tejanagara ber bandhu,

Sragen tlatah ayem ayom.

Wejangan Ki Ageng Butuh,

Dadi kawruh minangka pituduh,

Amrih Sragen gemah ripah loh jinawi,

Sukawati subur makmur,

Kabupaten kang mencorong.

Kawula dasih nyengkuyung,

Kraton Pajang paring payung agung,

Pasir wukir warisane Joko Tingkir,

Wujud barat bumi banyu,

Mandraguna lahir batos.

Peguron Ki Ageng Butuh.

Megatruh Sigra Milir

Sigra milir sang gethek sinangga bajul,

kawan dasa kang njageni,

ing ngarsa miwah ing pungkur,

tanapi ing kanan kering,

sang gethek lampahnya alon.

Wus binucal welah lawan satangipun,

ki Wila lan ki Wuragil,

eca pra samya pitekur,

angadhep gusti sang pekik,

bakda ngisa prapteng Betog.

Lampahnya lon serep rare prapteng Butuh,

rahaden ika tan pangling,

lamun laladaning Butuh,

arsa kendel raden pekik,

amangsit bajul kang gendhong.

Ingkang gethek ginetog-getog ping telu,

ingkang bajul mirsa wangsit,

ingkarsane raden bagus,

anulya binekta minggir,

cinacang kang gethek alon.

Mring ki Wila lawan ki Wuragil sampun,

cinancang witing kuweni,

akukuh cinancang eduk,

karipan samya aguling,

sadaya samya kuwayon.

Dhandhanggula Joko Tingkir

Pagagane sawetane kali,

Nusul marang rencange wakira,

Kakalih juru gagane,

Sadina datan mantuk,

Santri kalih mulih abukti,

Mulih sawise ngasar,

Nengna kang winuwus,

Jeng Sinuwun Kalijaga,

Sangking kidul malampah atekem ecis,

Sangking ing pamancingan.

Nguwuh-uwuh sajawining gagi,

Heh ta jebeng denira agaga,

Nuli marenana age,

Pan sira bakal ratu,

Ingkang mengku ing tanah Jawi,

Angur nuli suwita,

Mring Demak ta kulup,

Ing kono dadi jalaran,

Yata lajeng wau jeng Sinuhun Kali,

Ngaler leres lampahnya.

Dhandhanggula Pepali Ki Ageng Sela

Pepaliku ajinen mbrekati,

tur Selamet sarta kuwarasan,

pepali iku mangkene:

aja agawe angkuh,

aja ladak lan aja jail,

aja ati serakah,

lan aja celimut,

lan aja mburu aleman,

aja lada wong ladak pan gelis mati,

lan aja ati ngiwa.

Padha sira titirua kaki,

jalma patrap iku kasihana,

iku arahen sawabe,

ambrekati wong iku,

nora kena sira wadani,

tiniru iku kena,

pambegane alus,

yen angucap ngarah-arah,

yen alungguh nora pegat ngati-ati,

nora gelem gumampang.

Sapa sapa wong kang gawe becik,

nora wurung mbenjang manggih arja,

tekeng saturun turune,

yen sira dadi agung,

amarintah marang wong cilik,

aja sedaya-daya,

mundhak ora tulus,

nggonmu dadi pangauban,

aja nacah, marentaha kang patitis,

nganggoa tepa-tepa.

Padha sira ngestokena kaki,

tutur ingsun kang nedya utama,

angarjani sarirane,

way nganti seling surup,

yen tumpang suh iku niwasi,

hanggung atelanjukan,

temah sasar susur,

tengraning jalma utama,

bisa nimbang kang ala lawan kang becik,

rasa rasaning kembang.

Kawruhana pambengkasing kardi,

pakuning rat lelananging jagad,

pambengkasing jagad kabeh,

amung budi rahayu,

setya tuhu marang Hyang Widi,

warastra pira pira,

kang hanggung ginunggung,

kasor dening tyas raharja,

harjaning rat punika pakuning bumi,

kabeh hayu yuwana.

Dhandhanggula Siti Jenar

Sadat salat puwasa kawuri,

Apa dene jakat lawan pitrah,

Ujar piwulang kabeh,

Yogya kena ginugu,

Kudu nyingkur durjaning budi,

Datan ngapusi titah,

Sinung swarga besuk,

Para siswa Siti Jenar,

Amikani babaran ngelmu sejati,

Wejangan Lemah Abang.

Ki Ageng Butuh lenggah miyarsi,

Syekh Siti Jenar paring wedharan,

Marang sagung siswa Sragen,

Yen wus ngapal lakumu,

Jatine bisa pinanggih,

Aneng dunya delahan,

Menep jroning kalbu,

Mbabar ilmu kasampurnan,

Sinebut manunggaling kawula Gusti,

Pangeran Maha Tunggal.

BAB VII

PAKASA PANG KUDUS

Dhandhanggula

Suka sukur kagem ambal warsi,

Panjang yuswa saking pang Pakasa,

Ing sanga likur Nopember,

Pahargyan tlatah Kudus,

Kang pinuji murah rejeki,

Salira bagas waras,

Mitra guyub rukun,

Sami samad sinamadan,

Dha gemati sarana silaturahmi,

Ginanjar bagya mulya.

Sinom

Tlatah kanggo patuladhan,

Mekaring akulturasi,

Agama miwah budaya,

Lumampah maju lestari,

Permana lan permati,

Wejangan Jeng Sunan Kudus,

Kukuh mbangun menara,

Minulya adat kawuri,

Tepa slira tumraping tradisi kuna.

Kinanthi

Sunan Kudus mbabar ngelmu,

Murih tumangkar agami,

Sinebut wulang syariat,

Tarikat wedharan ping dwi,

Kaping tri nyebat hakikat,

Kapat makrifat sejati.

Gambuh

Ulama paring tuduh,

Barang kawruh prayoga den weruh,

Sunan Kudus tetungguling para Wali,

Priyayi sami meguru,

Mawi patrap andhap asor.

Pangkur

Raden Patah wus kaloka,

Narendra binathara nyakrawati,

Murid Kanjeng Sunan Kudus,

Kraton Demak Bintara,

Nyata baut panguwasa dharat laut,

Sinengkuyung Wali Sanga,

Muslimin ing tanah Jawi.

Pucung

Kutha Kudus wilayahe bagus alus,

Wewarah ngrembaka,

Wicaksana para Wali,

Masyarakat ngrasuk ajaran manfaat.

Asmarandana

Akhlakul karimah becik,

Rakyat gunung kutha desa,

Sangu amal ibadahe,

Pribadi warga sakbrayat,

Slamet dunya lan akhirat,

Miturut Jeng Sunan Kudus,

Wulang wuruk kasampurnan.

Mijil

Tlatah Demak Purwodadi Pati,

Jepara lor kulon,

Rembang Blora Semarang cerake,

Dununge pasinaon pra murid,

Santri ngangsu ngelmi,

Marang Sunan Kudus.

Durma

Among dagang Kutha Kudus pancen kondhang,

Kemajuan industri,

Tumangkar sumebar,

Gemah ripah raharja,

Sarjana winasis angudi,

Arah sejarah,

Maos tepa palupi,

10.

Maskumambang

Kanjeng Sunan Kudus mbangun kutha santri,

Wiwit jaman Kraton Demak,

Tumuli Pajang Mentawis,

Nganti Kraton Kartasura.

11.

Megatruh

Kudus agung ayom ayem gya ngrembuyung,

Sate kebo tanpa sapi,

Kapitayan kang rumuhun,

Tetepa moncer kang pamor.

BABA VIII

PAKASA PANG PACITAN

Dhandhanggula

Sekar dhandhanggendhis amurwani,

Hadeging Kabupaten Pacitan,

Kawentar laladan gedhe,

Tlatah panjang punjung,

Kang gemah ripah loh jinawi,

Tata tentrem raharja,

Kutha desa gunung,

Kawibawan kawidadan,

Wus den udi murih basuki lestari,

Sarana njunjung praja.

Duk nalika Raden Jaka Tingkir,

Jejuluk Sultan Hadiwijaya,

Ingaranan Mas Karebet,

Raja kuncara arum,

Dhatulaya ing Pajang Pengging,

Paripurna misuda,

Adipati agung,

Raden Arya Purbengkara,

Sarwa eling asma Demang Banakeling,

Mandhegani Pacitan.

Sinengkalan tenger edi peni,

Angkasa sapta panca baskara,

Tinulis tanggal selawe,

Sasi Mei pikantuk,

Lilah saking pangarsa nagri,

Nayaka lan kawula,

Kersa anyengkuyung,

Mbata rubuh mawurahan,

Bendhe beri puksur tambur suling peling,

Lumampah nut wirama.

Purbengkara jumeneng bupati,

Momong momor momot ing Pacitan,

Kadipaten saya rame,

Makmur mekar ngrembuyung,

Sengkut gumregut Banakeling,

Gya gumregah makarya,

Ing pesisir kidul,

Gumreget mranata praja,

Kakung putri saiyek saeka kapti,

Tumuju mring kamulyan.

Kanjeng Sindunagara Dipati,

setya tuhu Tumenggung Pacitan,

Kapitayan kang sumendhe,

Dhateng agama luhur,

Ber bandha ber bandhu ber budi,

Laku bawa laksana,

Putus barang kawruh,

Ambeg adil paramarta,

Wus marsudi mrih tentreme wong sabumi,

Ngejayeng jagat raya.

Sembah kalbu yen lumintu dadi laku.

Manggih hayu ayem tentrem kang tinemu.

Balung janur, janur ingisenan boga.

Widadaa, lepat saking sambikala.

BAB IX

PAKASA PANG PONOROGO

Dhandhanggula

Sagung warga Pakasa mengeti,

Ponorogo kutha kencar kawentar,

Sumber prastawa sumendhe,

Pitulas telu wolu,

Kanjeng Sunan Paku Buwana Dwi,

Wus yasa pesanggrahan,

Wisma Prabu Kumbul,

Sinebat Praba Suyasa,

Purwagiri lir pendah Amarta nagri,

Murwani mbangun praja.

Sinom

Jeng Tumenggung Hanggawangsa,

Kaparingan emas picis,

Minangka mupakat wragat,

Ndherek sarjana winasis,

Tukang rikat terampil,

Dhatulaya gya binangun,

Karaton Surakarta,

Dangunipun pitung warsi,

Ponorogo dadya papan kutha praja.

Kinanthi

Jeng Pangeran Kadilangu,

Padmanagara Dipati,

Kanjeng Purbaya Lamongan,

Nyengkuyung Pangeran Wijil,

Suwita Paku Buwana,

Gancar hadeging negari.

Mijil

Gusti Kanjeng Ratu Prameswari,

Momong momor momot,

Putri saking bang wetan bang kilen,

Sodagar dagang tlatah pesisir,

Pasok bulu bekti,

Kedhaton binangun.

Gambuh

Ponorogo lumaku,

Udhu bahu suku bandha bandhu,

Barang manis emas picis gagas aris,

Konjuk ndherek Jeng Sinuwun,

Paripurna yasa Kraton.

Wusnya rampung gawa gawe panjang punjung,

Boyong dhatulaya,

Saking tlatah Kartawani

Kalokengrat Surakarta Hadiningrat.

Pangkur

Labuh labet marang praja,

Ponorogo tatas titis winasis,

Saben dina sasi tahun,

Merdika seba sowan,

Bagus alus jiwa raga ati tulus,

Gawa gawe sesanggeman,

Pikukuhing jatidiri.

BAB X

PAKASA

PANG BOYOLALI

Pangkur Tasikwulan.

Putri trah Singaprana,

Tasikwulan putri kapernah ping tri,

Darah Majapahit tuhu,

Demak Pajang Mataram,

Brawijaya Pembayun ilining kayun,

Jaka Tingkir lan Benawa,

Leluhur ing Tanah Jawi.

Raden Kajor Danupaya,

Singaprana Walen ingkang pinundhi,

Putra Singaprana Agung,

Kaping tri Singawangsa,

Tasikwulan putra Ratu Mas Rahayu,

Garwa narendra sudibya,

Mbahu dhendha nyakrawati.

Dhandhanggula Singawangsa.

Kanjeng Singaprana kang kaping tri,

Kawentar sinebut Singawangsa,

Priyagung tirakat gedhe,

Tasikwulan rahayu,

Garwa agung Jeng Mangkubumi,

Sutanipun Ratu Mas,

Tata tatag tutug,

Prameswari nata Sala,

Binathara paramarta ambeg adil,

Ngejayeng nuswantara.

Pucung Pangeran Pati.

Jiwa agung momong putra trus ngrembuyung,

Putri Tasikwulan,

Nggulawenthah Natasiwi,

Boga wastra wisma wasis wicaksana.

Setya tuhu jroning kalbu ngudi ngelmu,

Kawruh tata praja,

Among dagang juru tani,

Gya jumangkah ngarah arah sumarambah.

Sambang sambung kadang mitra sawang srawung,

Mrantasi pakaryan,

Nbudidaya urup urip,

Wus kawentar Pangeran Pati sumebar.

Dhandhanggula Rantansari.

Babat Sima ngumandhang winarni,

Rikala Ki Ageng Singaprana,

Jayakartika putrane,

Trahing kusuma arum,

Rantansari putri linuwih,

Garwa Sinuwun Sala,

Raden Kusen sunu,

Sigra jumeneng narendra,

Sunan Paku Buwana Wolu pinuji,

Surakarta Diningrat.

Kuneng Raden Ayu Rantansari,

Garwa Dalem Sinuwun Kaping Pat,

Jayakartika ramane,

Singaprana rumuhun,

Demang Santa Manggala nguni,

Pangageng abdi keparak,

Pangarsa panewu,

Ki Ageng Hanggawijaya,

Sung pepeling tedhak turun Ki Ageng Giring,

Demak Pajang Mataram.

Gambuh Singaprana

Brahmana kang misuwur,

Singaprana turune ngaluhur,

Sung palupi dharahe wiji sejati,

Mejang kagem wayah sunu,

Pangawikan lahir batos.

Jayakartika ampuh,

Teguh wutuh sepuh saguh tangguh,

Tata titi tatag tutug tatas titis,

Rantansari Raden Ayu,

Prayoga becik rinaos.

Lelandhes ilmu laku,

Trahing kusuma rembesing madu,

Mesu budi murih basuki lestari,

Mendhem jero mikul dhuwur,

Warga Sima antuk bobot.

Pangkur Raden Kusen.

Sinuwun Paku Buwana,

Ingkang jumeneng kaping wolu nenggih,

Kalampahan sampun dhaup,

Raden Ajeng Ngaisah,

Putri agung budi pekerti kang luhung,

Atmaja Purbanagara,

Adipati ing Kediri,

Trah Pura Mangkunegaran,

Sesambetan Daha Jenggala Manik,

Jeng Panji Asmara Bangun,

Galuh Candra Kirana,

Marmanipun warga Sima kedah purun,

Mituhu mring Singaprana,

Pepundhen ing Boyolali.

Kinanthi Jayakartika

Jayakartika wus saguh,

Sabarang gawe mrantasi,

Kanuragan kawijayan,

Putus reh salwiring ngelmi,

Tuladha ing tlatah Sima,

Suta putri Rantansari.

Kebak purun pra priyantun,

Labuh labet ing negari,

Abdi panewu keparak,

Gedhong tengen kang pinilih,

Kadipaten anom ngasta,

Minangka pangarsa mantri.

Sinom Sima Minulya

Sima minulya widada,

Wibawane anelahi,

Kabagyan lan karaharjan,

Ayem ayom tentrem ati,

Tansah waspada eling,

Wejangan para leluhur,

Ki Ageng Singaprana,

Jayakartika maringi,

Wulang wuruk sorah warah ngarah arah.

Nalikane palakrama,

Raden Ayu Rantansari,

Suwita Sinuwun Sunan,

Tarak brata mesu budi,

Ing Pasiraman Pengging,

Mugi antuk bibit ratu,

Ngejayeng Surakarta,

Binathara nyakrawati,

Narendra gung ambeg adil paramarta.

Pucung Sima Martani.

Pari jagung sempulur tuwuh ngrembuyung,

Murah sandhang pangan,

Pakaryane kadang tani,

Among dagang saba pasar kang ngumandhang.

Sarwa makmur tlatah Sima pancen mujur,

Sakehing janganan,

Bayem kangkung terong buncis,

Palakitri palagandhul palawija.

Sawo jambu pisang pelem salak dhuku,

Aneng tegal sawah,

Panggautan laris manis,

Suka bungah panguripan tambah turah.

Megatruh Sima Misuwur.

Kulon Sima ing pereng gunung Merbabu,

Kidule gunung Merapi,

Kiwa tengen umbul mancur,

Banyune mili neng kali,

Sawah gembur ora atos.

Kidul Sima banyu bening ana wadhuk,

Misuwur sinebut Cengklik,

Tetuwuhan tandur subur,

Bagas waras kadang tani,

Panguripan sarwa maton.

Asmarandana Sima Makmur.

Sima tlatah Boyolali,

Gunung Kendheng katon endah,

Nganti tekan Karanggedhe,

Kacangan Wanasegara,

Juwangi Klego lan Ngemplak,

Banyudana Sela Musuk,

Ampel Cepaga Sugihan.

Suka sukur lahir batin,

Genep jangkep jangkah genah,

Sima papan

Nengsemake,

Adi asri sesawangan,

Tegal sawah pegunungan,

Kali nut iline banyu,

Pertanian perdagangan.

Maskumambang Sima Guyub.

Waga Sima guyub rukun amakarti,

Ngayahi pakaryan praja,

Kang den esti bareng mukti,

Sanak kadang pawong mitra.

Lumrah banget sajroning bebrayan urip,

Sumendhe marang panembah,

Karyenak dhateng sesami,

Den arah ginanjar berkah.

Gotong royong nyambut gawe kerja bakti,

Buwuh jagong sambung sambang,

Srawung sawang tulus ati,

Warga Sima kasembadan.

10.

Mijil Sima Lumaris.

Tlatah Sima nedheng pacak baris,

Gumeleng gemolong,

Sepi ing pamrih rame ing gawe,

Gumyak sigrak gancang lumaris,

Kaheh mudha mudhi,

Gumreget gumregut.

Pana pakarti pakerti pekerti,

Jangkah saben miyos,

Linggar jengkar saking bale gedhe,

Lumampah dhasar dugi prayogi,

Guna edi peni,

Daya adi luhung.

11.

Durma Sima Makarya.

Wejangan ki pujangga Yasadipura,

Lumantar serat tulis,

Ing sastra piwulang,

Kang wus ngripta utama,

Sasana sunu dewaruci,

Mbabar wulangan,

Sesorah warah becik.

Tedhak turun Kyai Ageng Singaprana,

Kang wayah Rantansari,

Garwa Sunan Sala,

Paku Buwana papat,

Jayakartika wusnya mardi,

Kusen saking Sima,

Kang jumeneng narpati.

Sinom

Jeng Ratu Mas Tasikwulan,

Kulina tapa semedi,

Ngeli urute bengawan,

Kungkum aneng umbul Pengging,

Mastuti kagem siwi,

Putra dalem Jeng Sinuwun,

Paku Buwana ping sad,

Dheteng Ambon mesu budi,

Temah Gusti Duksina jumeneng nata.

BAB XI

PAKASA PANG CILACAP

Dhandhanggula

Babad Cilacap ingkang winarni,

Murwani jaman Demak Bintara,

Ganda melathi rinonce,

Angambar wangi arum,

Wedharan ing Tanah Jawi,

Lumantar Wali Sanga,

Gancar mbabar kawruh,

Jaka Tingkir Kraton Pajang,

Mandhegani murih basuki lestari,

Nama Joko Kahiman.

Kinanthi

Joko Kahiman satuhu,

Titis wasis samukawis,

Atmaja Sunan Prawata,

Kinen jumeneng Bupati,

Pangarsa tlatah Banyumas,

Dhawuh raja Jaka Tingkir.

Mijil

Bupati sigra sengkut makarti,

Manunggal gumolong,

Cipta rasa karsa karya gedhe,

Linambaran pakarti pekerti,

Banyumas sejati,

Lila guyub rukun.

Gambuh

Bangunan saka kayu,

Ing pangajab pikantuk rahayu,

Amangkurat Kanjeng Ratu Wiratsari,

Banyumas tambah ngrembuyung,

Suka gembira rinaos.

Pangkur

Para Bupati Banyumas,

Golong gilig arsa mbangun negari,

Dhawuh Amangkurat Agung,

Nuhoni Ratu Kencana,

Mrih rahayu iline kali Serayu,

Angocori sawah sawah,

Tela pohung jagung pari.

Asmarandana

Kanjeng Ratu Wiratsari,

Prameswari Amangkurat,

Yasa Kedhaton Pamase,

Ambangun tlatah Banyumas,

ing Lesmana Ajibarang,

Mahargya Ratu Serayu,

Kadang tani among dagang.

Pucung

Alun alun papan amba kebak purun,

Aneng Purwakerta,

Among dagang laris manis,

Amangkurat paring cahya kang sumirat.

Megatruh

Sarwa luhur Banyumas wilayah subur,

Kabawah kraton Mentawis,

Raja Amangkurat Agung,

Sarta Ratu Wiratsari,

Pura Pamase mencorong.

Pucung

Desa gunung seni tumangkar ngrembuyung,

Wilayah Banyumas,

Kanjeng Ratu Wiratsari,

Amangkurat nata agung hayuningrat.

Kinanthi

Lumaku toya Serayu,

Kinclong kinclong sarwa bening,

Kanjeng Sunan Amangkurat,

Sesarengan prameswari,

Nyawang gunung Slamet endah,

Banyumas kang edi peni.

Pangkur

Dhatulaya Ajibarang,

Papan sumber emas kencana rukmi,

Nata Amangkurat Agung,

Wiratsari kang garwa,

Paring dhawuh mrih Banyumas wutuh tangguh,

Kuwat drajat pangkat semat,

Sugih bandha bandhu budi.

Pucung

Ing Serayu kali ayu lan rahayu,

Sunan Amangkurat,

Tapa kungkum tapa ngeli,

Mesu jiwa anoraga cipta rasa.

Sinom

Garwa dalem Amangkurat,

Kanjeng Ratu Wiratsari,

Katelah Ratu Kencana,

Tedhak turun Jaka Tingkir,

Nyata putri linuwih,

Sinebut Ratu Serayu,

Mbangun nagri Mataram,

Gemah ripah loh jinawi,

Wiwit brang wetan nganti tlatah Banyumas.

Maskumambang

Bungah susah yekti gawane ngaurip,

Kawula tlatah Banyumas,

Mersudi luhuring budi,

Suwita Kraton Mataram

Durma

Tuking rukmi aneng desa Pancurendhang,

Rajabrana mas picis,

Sumber penghasilan,

Tumrap praja Mataram,

Mbudidaya Sri Wiratsari,

Sri Amangkurat,

Mersudi pala karti.

Gambuh

Papan kidul pununjul,

Gunung Slamet agung kaya payung, Ambawahi wilayah Banyumas kang peni,

Amangkurat terus ambangun,

Sigrak gumyak gotong royong.

Pangkur

Jeng Pangran Kajor kocap,

Sentana kang sugih inten mas picis,

Bandha bandhu tanah mbrewu,

Tedhak Pangeran Benawa,

Wus misuwur trah Pajang kang makmur,

Wiratsari ingkang putra,

Ginarwa Sri Tegalwamgi

Dhandhanggula

Guru bangsa mbabar wiyatadi,

Kawentar Pangeran Karanggayam,

Saking wilayah Kebumen,

Pituduh barang kawruh,

Paugeran tata negari,

Peprentahan bebrayan,

Pandoming pandulu,

Jeng Sultan Hadiwijaya,

Paring dhawuh murih rahayu lestari,

Pujangga Kraton Pajang.

Pangkur

Kaloka Sri Ratu Batang,

Ing Mataram minangka prameswari,

Garwanipun Sultan Agung,

Miyos Sri Amangkurat,

Sampun purun tlatah Banyumas binangun,

Narendra gung binathara,

Mbahu dhendha nyakrawati.

Kinanthi

Kanjeng Ratu Mas Serayu,

Pinilih putri linuwih,

Atmaja Joko Kahiman,

Hupasanta malakrami,

Miyos Kanjeng Ratu Batang,

Sultan Agung ing Mentawis.

Dhandhanggula

Pantes luwes kinarya palupi,

Labuh labet raja Amangkurat,

Yasa Kedhaton Pamase,

Sayekti tangguh ampuh,

Mbangun jaman kencana rukmi,

Lesmana Ajibarang,

Pancurendhang mancur,

Emas picis rajabrana,

Bandha bandhu budi linangkung utami,

Kanjeng Ratu Kencana.

BAB 12

PAKASA PANG TRENGGALEK

Mijil

Tata titi nggennya mangastuti,

Suwita Karaton,

Sigrak gumyak Pakasa Trenggalek,

Anglangkungi supitaning hardi,

Gembira ing margi,

Mantep jroning kalbu.

Pucung

Langkah maju kasembadan kang tinuju,

Sabarang pakaryan,

Gawa gawe angrampungi,

Suka lila srana rumeksa budaya.

Gambuh

Mawi dhasar pituduh,

Tanggap tanggon tangguh ampuh wutuh,

Tandang kardi mesu budi siyang ratri,

iguh gupuh arah aruh,

Pakasa tambah sumorot.

Pangkur

Saben wanci pisowanan,

Besus alus busana katon asri,

Gumebyar endah kadulu,

Beskap iket nyampingan,

Ukel sabuk timang epek selop gathuk,

Wangkingan radya laksana,

Samir warni abang kuning.

Dhandhanggula

Sowan Kraton permana permati,

Tata cara adat wus lumampah,

Muludan grebeg sekaten,

Pasa malem selikur,

Idul fitri silahturahmi,

Nuli grebeg besaran,

Lan maesa lawung,

Ing Alas Krendha Wahana,

Nyadran mligi Kutha Gedhe Imogiri,

Sura kirab pusaka.

Sinom

Ndherek Kraton Surakarta,

Wujud nyata angleluri,

Lestarining kabudayan,

Wiwit jaman kuna nguni,

Pancen jenenge wajib,

Warisan sambung sinambung,

Daya kuwat santosa,

Mangka pisungsung sumbangsih,

Jagat raya lumaksita gya tumata.

Cari Blog Ini

warta bangun bangsa

Mangayu Bagya PAKASA

Mangayu Bagya PAKASA

Komentar

Posting Komentar

Postingan populer dari blog ini

Asal Usul Leluhur Prabowo Subianto

SUGENG RIYADI IDUL FITRI.

Macapat Mahargya Dr Sudarmaji M.Pd.