Macapat Desa Sidokare

 Macapat Desa Sidokare

Purwadi, 

Ketua Lokantara

HP 087864404347

1.

Dhandhanggula Sidokare. 

Tata cara ing sedhekah bumi, 

Anyarengi upacara nyadran, 

Aneng desa Sidokare, 

Dadi srana nenuwun, 

Marang Gusti kang Maha Suci, 

Sagung karang padesan, 

Urip subur makmur, 

Murah sandhang pangan papan, 

Panjang punjung gemah ripah loh jinawi, 

Tentrem kerta raharja. 

Wanci nuju hari Jumah paing, 

Kapurwakan kanthi wilujengan, 

Kumpul ana sumur gedhe, 

Nuli sowan leluhur, 

Kyai Modin gya andongani, 

Mbrengengeng ing sareyan, 

Kagem kang wus surud, 

Manjing alam kesuwargan, 

Puja puji manggih basuki lestari, 

Sumrambah putra wayah. 

2.

Kinanthi Sidokare. 

Sidokare guyub rukun, 

Gotong royong tandang kardi,

Dalan alus tur warata, 

Kerja bakti resik resik, 

Pager gapura tumata, 

Pak Lurah kang mandhegani. 

Nanggap seni langen tayub, 

Panjak tandhak kang pinilih, 

Gayeng regeng gumyak sigrak, 

Pacak gulu joged ngibing, 

Tombok wol ser nut wirama, 

Slendro pelog laras gendhing. 

3.

Gambuh Sidokare. 

Meriah wiwit esuk, 

Sarwa gathuk suguhan sing mathuk, 

Jadah jenang rengginang kerupuk wajik, 

Sami eca dhahar ngunjuk, 

Wis cumawis gedhang kepok. 

Kembul bujana bathu, 

Lawuh ingkung paringan Mbah Kakung, 

Ngasta berkat kondur undangan kenduri, 

Sidokare wayah dalu, 

Pasugatan sega rawon. 

4.

Pucung Sidokare

Wus lumaku sing tinuju tambah maju, 

Sidokare nyadran, 

Pesta sedina sewengi, 

Nanggap wayang crita pakem trus ngumandhang. 

Dalang kondhang sabet trampil suluk gandhang, 

Nabuh pra wiyaga, 

Waranggana nembang becik, 

Pamiyarsa sanyata suka gembira. 

Weh lelipur Sidokare wis misuwur, 

Ngleluri budaya, 

Tuwa mudha jaler estri, 

Bagya mulya sesrawungan ana desa.

5.

Sinom Sidokare. 

Kondhang bakul kulak brambang, 

Sidokare wasis titis, 

Bungah betah saba sawah, 

Juru dagang among tani, 

Tansah gemi nastiti, 

Teken tekan krana tekun, 

Sakjroning nyambut karya, 

Enjang sore siyang ratri, 

Saya kiyat mbudidaya wong sakbrayat. 

Ingon ingon sapi menda, 

Ayam bebek menthok minthi, 

Nyambi ngopeni tanduran, 

Tela pohung jagung pari,

Pelem cerme trembesi, 

Bayem terong lombok kangkung, 

Pring ori waru klapa, 

Bandha bandhu emas picis, 

Sidokare sida mukti sida mulya.