MACAPAT PASA RAMADHAN

 MACAPAT PASA RAMADHAN


Purwadi, 

Ketua Lokantara, 

HP 087864404347


1.

Dhandhanggula Sasi Pasa. 


Wulan Pasa nyata wus pinanggih, 

Rinengga kanthi nyadran ruwahan, 

Nyekar pepundhen sumare, 

Sowan para leluhur, 

Ing pangajab bisa mberkahi, 

Nyuwun idi palilah, 

Pandonga pangestu, 

Dene para putra wayah, 

Ingkang bekti marang lelakon kawuri, 

Lumampah saben warsa. 


Ramadhan mangka pethingan sasi, 

Sinambrama mawi tata cara, 

Kabeh pasiraman rame, 

Tapa kungkum ing umbul, 

Tapa ngeli iline kali, 

Kumambang banyu sendhang, 

Minangka lelaku, 

Murih padhanging sasmita, 

Ngestu ngesti wulang wejangan permati, 

Pujangga tanah Jawa. 


2.

Pangkur Sasi Pasa. 


Mahargya pasa Ramadhan, 

Kapurwakan upacara kenduri, 

Wilujengan dhahar ngunjuk, 

Undangan sanak kadang, 

Suka sukur sami gesang subur makmur, 

Bungah nyawang tegal sawah, 

Panen tela jagung pari. 


Ngalap berkah wulan pasa, 

Tumrapipun ingon ingone tani, 

Menda kebo kuda lembu,

Bebek menthok lan ayam, 

Jenjem cumbu ayem tentrem merikelu, 

Amberkahi sato kewan, 

Wedharan para winasis.


3.

Kinanthi Sasi Pasa


Puwasa jaman rumuhun, 

Wulang wuruke agami, 

Ing Kraton Demak Bintara, 

Sultan nyebar udhik udhik, 

Pelataran Mesjid besar, 

Manunggal kawula gusti. 


Kawiwitan nabuh bedhug,

Ngumandhang ngebaki nagri, 

Gumyak swaraning dhugdheran, 

Piyak ngarep tangkep wuri, 

Sambung lagon santiswaran, 

Ndherek ngaos para Wali.


4.

Gambuh Sasi Pasa


Njeng Sultan Pajang dhawuh, 

Sasi pasa kedah ngangsu kawruh, 

Dimen wasis titis karya samukawis, 

Ngaji sakeh kitab buku, 

Seratan sigra kawaos. 


Ki Ageng Banyubiru, 

Jaka Tingkir suwita meguru, 

Sasi pasa cegah dhawar lawan guling, 

Karebet tekun mituhu, 

Nata Pajang kang kesohor.


5.

Sinom Sasi Pasa


Wulan Pasa ing Metaram, 

Mejang marang Senapati, 

Ki Ageng Pemanahan, 

Kinarya laku prihatin, 

Ngemong Juru Martani, 

Tapa ing segara kidul, 

Antuk wahyu jatmika,

Nuli ing kayangan Dlepih, 

Sujud sukur marang Gusti Maha Tunggal. 


Siram ing sendang Seliran, 

Sagung darah ing Mentawis, 

Mahargya wulan Ramadhan, 

Minangka sesuci dhiri, 

Tirakat lahir batin, 

Ganda dupa sekar arum, 

Wadhah bokor kencana, 

Mbrengengeng pamuji dzikir, 

Abdi dalem ulama manengku puja.


6.

Asmarandana Sasi Pasa. 


Amangkurat Tegalwangi, 

Tarak brata wulan siyam, 

Aneng Kedhaton Pamase, 

Sakwetane Ajibarang, 

Dhusune nama Lesmana, 

Jamasan kali Serayu,

Salat tarweh ing Banyumas. 


Gunung Slamet peni asri, 

Laku ibadah Ramadhan, 

Marang Pangeran sumendhe, 

Tapa narendra Mataram, 

Mrih raharjaning negara, 

Nindakna sholat tahajjud, 

Sinengkuyung pra kawula. 


7.

Mijil Sasi Pasa


Pasanipun Amangkurat Jawi, 

Manjing raos batos, 

Siram jamas wiwit wanci sore, 

Nggebyur kungkum aneng umbul Pengging, 

Ngantos madya ratri, 

Mbacut laku sujud. 


Lambaraning Kartasura nagri, 

Lelaku prihatos, 

Wulan Ramadhan berkahe gedhe, 

Kagem ndhudhah wulangan prayogi, 

Serat Nitisruti, 

Ngemot barang ngelmu. 


8.

Pucung Sasi Pasa. 


Adi luhung wejangane Sultan Agung, 

Wewarah Ramadhan, 

Sasi Pasa wulan suci, 

Bebles tenan mulang ngelmu kasampurnan.


Mbabar kawruh wulan Pasa sung pituduh, 

Serat pangracutan, 

Nitipraja Sastra Gendhing, 

Trah Mataram tata tentrem alam. 


9.

Megatruh Sasi Pasa. 


Mejang ngelmu Amangkurat Mas kang tinemu, 

Aneng wilayah Kediri, 

Wulan Pasa pancen unggul, 

Tirakat ing gunung Wilis, 

Gya munajat mring Hyang Manon. 


Sujud sukur kawulane amrih makmur, 

Amangkurat ing Kediri, 

Tahajud kanthi sumuyut, 

Raja Mataram ber budi, 

Sumare Hastana Gedhong.


10.

Maskumambang Sasi Pasa. 


Amangkurat Amral pasa mesu budi, 

Ing Mataram Kartasura, 

Kanthi laku tapa ngeli, 

Urute kali Larangan.


Ingembanan dening Ratu Wandhansari, 

Saking tlatah Surabaya, 

Garwa Adipati Pekik, 

Nyengkuyung nata Mataram. 


11.

Durma Sasi Pasa


Kanjeng Sunan Paku Buwana kapisan, 

Lan garwa prameswari, 

Ratu Mas Balitar, 

Lampah siyam Ramadhan, 

Wulujengan ing Cakra Pengging, 

Kempal kawula, 

Semedi pangastuti. 


Sasi Pasa agama mangka sarana, 

Kartasura Mentawis, 

Kawula negara, 

Tentrem karta raharja,

Lelandhesan kawruh agami, 

Wulan Ramadhan, 

Berkah Wahyu ilahi.

Komentar

Posting Komentar

Postingan populer dari blog ini

SARASEHAN PUSAKA BEDAYA KETAWANG

Gambar
  SARASEHAN PUSAKA BEDAYA KETAWANG  Oleh Dr Purwadi SS M.Hum. Ketua LOKANTARA, Lembaga Olah Kajian Nusantara. Hp 087864404347 Pusaka Bedaya Ketawang dibahas dengan penuh keagungan. Pada hari Jumat Pon, tanggal 25 Agustus 2023 diselenggarakan sarasehan budaya. Bertempat di Fakultas Bahasa Seni dan Budaya atau FBSB Universitas Negeri Yogyakarta. Dra GKR Koes Moertiyah Wandansari M.Pd, KRT Widyo Winoto dan Prof Dr Suminto bertindak selaku narasumber.  Pahargyan utama diberikan oleh Dekan FBSB UNY, Prof Dr Sri Harti Widyastuti M.Hum. Hubungan dengan GKR Wandansari cukup dekat. Oleh karena warga UNY sering mengadakan penelitian di Karaton Surakarta Hadiningrat. Wakil Dekan dan pembesar Fakultas lengkap hadir. Gusti Mung didampingi Ndoro Arum Kusumo Pradopo dan sentana.  Kali ini sarasehan mengambil tema Manjing Kahanan. Makna manjing kahanan terkait dengan adabtasi. Perubahan budaya terjadi sepanjang sejarah. Maka perlu tepat dalam membaca owah gingsiring jaman. Persiapan acara oleh panitia
Baca selengkapnya

Macapat Mahargya Dr Sudarmaji M.Pd.

Gambar
  Macapat Mahargya Dr Sudarmaji M.Pd. 1. Dhandhanggula Sudarmaji Pahargyan kagem Pak Sudarmaji,  Sampun purna nempuh pendidikan,  Mangka kanugrahan gedhe,  Tanggale pitu likur,  Telu likur Desember sasi,  Sajroning pawiyatan,  FBSB ndulu,  UNY lumampah lancar,  Tata tatas titis ujian promosi,  Gelar Doktor kesandhang.  2. Pangkur Sudarmaji Rektor dosen tendik dekan,  Sami atur pambagya pangastuti,  Suka tandha  anyengkuyung,  Sarana jawat asta, Luru ilmu kanthi gemblenge panemu,  Tekat kuwat lan semangat,  Patuladhan Sudarmaji.  3. Gambuh Sudarmaji Saguh nempuh sinau,  Sudarmaji mbangun turut guru,  Nalikane lagi nulis disertasi,  Anuhoni promovendus,  Bimbingan para promotor.  4. Kinanthi Sudarmaji Promotor sing sepuh tangguh,  Asma Profesor Sugirin,  Pratomo Widodo nyata,  Guru Besar kang pinilih,  Ko promotor sabar drana,  Mulang muruk siyang ratri.  5. Sinom Sudarmaji Sudarmaji pendadaran,   Bu Prof Endang Nurhayati,  Siyaga dadya pangarsa,  Miwah Profesor Zamzani,  Prof Margana ut
Baca selengkapnya

SUGENG RIYADI IDUL FITRI.

Gambar
  SUGENG RIYADI IDUL FITRI.  Purwadi, Sari Indah Setiani, Adityo Jatmiko, Aryo Bimo Setiyanto, Anindito Wisnu Prasetyo.  1. Dhandhanggula Idul Fitri.  Sugeng hari raya Idul Fitri,  Wonten ngarsanipun Panjenengan,  Konjuk sesepuh pepundhen,  Kangmas adhik lan mbakyu,  Purwadi Sari nyuwun idi,  Adityo Bimo pasrah,  Anindito matur,  Ulat patrap lan pangucap,  Kirang utami luberna welas asih,  Dhateng kula sakbrayat.  Pareng nyuwun gunging pangaksami,  Awit saking kehing kalepatan,  Ingkang alit saha gedhe,  Jroning sambung lan srawung,  Muna muni kirang prayogi,  Anungkak tata krama,  Tilar unggah ungguh,  Sopan santun suba sita,  Pasrah dhiri mumpung hari Idul Fitri,  Kula trimah nglenggana.  Idul Fitri purna wulan suci,  Takbir tahlil tahmid gya ngumandhang,  Wiwit surupe srengenge, Siyang dalu amunjuk,  Suka sukur marang ilahi,  Sholat Id wanci enjang,  Jamaah sing khusuk,  Lebaran muncar sumunar,  Jawat asta sarana silahturahmi,  Apura ingapura Manggih hari raya Idul Fitri,  Wusnya ng
Baca selengkapnya