Macapat Mahargya Dr Sudarmaji M.Pd.

 Macapat Mahargya Dr Sudarmaji M.Pd.

1. Dhandhanggula Sudarmaji

Pahargyan kagem Pak Sudarmaji, 

Sampun purna nempuh pendidikan, 

Mangka kanugrahan gedhe, 

Tanggale pitu likur, 

Telu likur Desember sasi, 

Sajroning pawiyatan, 

FBSB ndulu, 

UNY lumampah lancar, 

Tata tatas titis ujian promosi, 

Gelar Doktor kesandhang. 

2. Pangkur Sudarmaji

Rektor dosen tendik dekan, 

Sami atur pambagya pangastuti, 

Suka tandha  anyengkuyung, 

Sarana jawat asta,

Luru ilmu kanthi gemblenge panemu, 

Tekat kuwat lan semangat, 

Patuladhan Sudarmaji. 

3. Gambuh Sudarmaji

Saguh nempuh sinau, 

Sudarmaji mbangun turut guru, 

Nalikane lagi nulis disertasi, 

Anuhoni promovendus, 

Bimbingan para promotor. 

4. Kinanthi Sudarmaji

Promotor sing sepuh tangguh, 

Asma Profesor Sugirin, 

Pratomo Widodo nyata, 

Guru Besar kang pinilih, 

Ko promotor sabar drana, 

Mulang muruk siyang ratri. 

5. Sinom Sudarmaji

Sudarmaji pendadaran,  

Bu Prof Endang Nurhayati, 

Siyaga dadya pangarsa, 

Miwah Profesor Zamzani, 

Prof Margana utami, 

Prof Sukarno tim panjurung, 

Ngayahi jejibahan, 

Minangkani tim penguji, 

Gya lumampah tata carane ilmiah. 

6. Asmarandana Sudarmaji

Budaya Jerman dikaji, 

Sumbere tanah Eropa, 

Perbandingan kono kene, 

Ilmu manca ilmu Jawa, 

Anjengkepi Nusantara, 

Sudarmaji yun kayungyun, 

Akulturasi budaya. 

7.  Maskumambang Sudarmaji

Basa sastra adi luhung edi peni, 

Bangsa Jerman sung tuladha, 

Sudarmaji mitayani, 

Mrih ngrembaka Indonesia. 

8. Durma Sudarmaji

Langkah jangkah Sudarmaji maju terus, 

Wasis ing samukawis, 

Micara mirasa, 

Karana tekun tekan, 

Jerman Jawa bisa nyawiji, 

Dugi Magetan, 

Perenge Lawu hardi. 

9. Mijil Sudarmaji

Kabudayan Jerman pancen penting, 

Antuk gelar Doktor, 

Toga kehormatan kang rinonce, 

Ich liebe dich Mener Sudarmaji, 

Wilujeng pamuji, 

Garwa putra putu. 

10. Pucung Sudarmaji

Wus misuwur Sudarmaji tansah mujur, 

Putra wayah bungah, 

Garwa nyengkuyung sayekti, 

Kulawarga tunggal cipta rasa karsa. 

11. Megatruh Sudarmaji

Puji atur Sudarmaji suka sukur, 

Marang Ingkang Maha Suci, 

Sungkem bekti tiyang sepuh, 

Kolega dosen lan tendik, 

Guyub rukun lahir batos. 

Purwadi, 

Jurusan Basa Jawa, 

FBSB UNY.